G‘ijduvonlik tadbirkor Akmaljon Halimov ezgu tashabbusni ilgari surgandi, ammo hafsalasi pir bo‘lishga ulgurdi. Bu haqda “Xalq so‘zi” xabar bermoqda.
U bundan 8 oy muqaddam tuman markazida “Dono chempion” deb nomlangan nodavlat maktabgacha ta’lim muassasasini barpo etdi. Qarovsiz holda yotgan bino o‘rnida zamonaviy bog‘cha qad rostladi. O‘zbek xonadonini eslatuvchi maskanda bolajonlar uchun barcha qulaylik yaratilgan.
— Yoshligimda xorijiy tillarni chuqur o‘rganish imkoniyati bo‘lmagan, — deydi u. — Shuning vajidan hayotda ko‘p bor qiynalganman. Tadbirkor bo‘lsam, albatta, bog‘cha ochaman, farzandlarimizning xorijiy tillarda ham biyron so‘zlasha olishlari uchun zarur shart-sharoitni yarataman, deya niyat qilgandim. Prezidentning nodavlat ta’lim muassasalari barpo etish to‘g‘risidagi qarori orzuim ro‘yobi sari yo‘l ochdi. Muassasamiz rus va ingliz tillarini o‘rgatishga ixtisoslashtirilgan. Hozir bu yerda 15 ta ish o‘rni yaratilgan, 80 nafar o‘g‘il-qiz tarbiyalanmoqda. Ularning shu kungi talablar asosida ta’lim-tarbiya olishlari uchun, hatto, Buxoro shahridan yetuk kadrlarni jalb qilganmiz. Maqsadimga yetganimdan xursandman.
Ammo tadbirkorning quvonchi uzoqqa cho‘zilmadi. A. Halimov nodavlat ta’lim muassasasini davlat-xususiy sherikligi asosida 180 o‘ringa mo‘ljallab kengaytirayotgandi. Shunga ko‘ra, “Dono chempion” loyiha-smeta xarajati 3 milliard 700 million so‘m qilib belgilandi. Shuning 1 milliard 500 million so‘mi o‘zining, qolgan 2 milliard 200 million so‘mi esa kredit hisobidan qoplanishi kerak edi.
— “Ipoteka-bank” “Sardor” filiali mutaxassislari binoni ko‘rib, qayta hisoblashdi va 1 milliard 700 million so‘m miqdorida imtiyozli kredit ajratilishini aytishdi, — deydi ishbilarmon. — Bog‘chani qurishda davom etdim. Bank bilan kredit shartnomasi tuzdim. Shu summa uchun bank sug‘urta ham qildirdi. Amalda esa menga 1 milliard 180 million so‘m miqdorida imtiyozli kredit berildi. Mablag‘ning qolgan qismini, ya’ni 520 million so‘mni olganimda muassasamiz binolarini to‘liq ta’mirlagan bo‘lardik. Natijada tarbiyalanuvchilar soni 180, ishlovchilar esa 33 nafarga yetardi.
Ma’lumot uchun, yaqinda o‘tgan xalq deputatlari G‘ijduvon tumani Kengashi sessiyasida Qonunchilik palatasi hamda Senat vakillaridan iborat ishchi guruh tomonidan o‘rganilgan qator masalalar muhokama qilingan, tumanda bolalarni maktabgacha ta’lim muassasalariga jalb qilish darajasi pastligi, 25 ta mahallada bunday muassasa yo‘qligi tanqid qilingandi...
Izoh (0)