Farg‘onada bir guruh faollarga O‘zbekiston Konstitutsiyasi qabul qilinganining 26 yilligi arafasida “Mahalla iftixori” ko‘krak nishonini tantanali topshirish marosimi bo‘lib o‘tdi. Bu haqda O‘zA xabar bermoqda.
“Davlat rahbarining 2017-yil 13-iyuldagi “Mahalla iftixori“ ko‘krak nishonini ta’sis etish to‘g‘risida”gi qarori fidoyi va mahalla-ko‘y, el-yurt tashvishida tunlarni tongga ulab ishlagan yurtdoshlarimiz mehnatiga munosib rag‘bat bo‘ldi”, — deyiladi xabarda.
Ilk bor berilayotgan ushbu nishonga joriy yilda Farg‘ona viloyatidan o‘zini o‘zi boshqarish organi ishlariga munosib hissa qo‘shib kelayotgan 36 nafar faol va tashabbuskor fuqaro hamda jamoatchilik tuzilmalari vakillari munosib ko‘rildi.
“Mahalla iftixori” ko‘krak nishoni bilan taqdirlangan fuqarolarni viloyat hokimi Sh.G‘aniyev qutladi va ularni o‘z egalariga tantanali topshirdi.
– Bosh qomusimiz bayrami arafasida bu mukofot bilan taqdirlanganimiz bizga alohida mas’uliyat yuklaydi, – deydi Qo‘qon shahridagi “Qaymoqli guzar” mahalla fuqarolar yig‘ini raisi Matluba Sodiqova. – Bugun yurtimizda mahalla tizimiga katta e’tibor qaratilmoqda. Mahallamizda istiqomat qilayotgan 3 mingga yaqin aholi barcha ishlarda faol. O‘tgan uch yil davomida hududimizda birorta jinoyat sodir etilmadi. Mahalla faollari bilan bamaslahat ish yuritayotganimiz bunda muhim o‘rin tutmoqda.
Izoh (0)