Фарғонада бир гуруҳ фаолларга Ўзбекистон Конституцияси қабул қилинганининг 26 йиллиги арафасида «Маҳалла ифтихори» кўкрак нишонини тантанали топшириш маросими бўлиб ўтди. Бу ҳақда ЎзА хабар бермоқда.
«Давлат раҳбарининг 2017 йил 13 июлдаги «Маҳалла ифтихори« кўкрак нишонини таъсис этиш тўғрисида»ги қарори фидойи ва маҳалла-кўй, эл-юрт ташвишида тунларни тонгга улаб ишлаган юртдошларимиз меҳнатига муносиб рағбат бўлди», — дейилади хабарда.
Илк бор берилаётган ушбу нишонга жорий йилда Фарғона вилоятидан ўзини ўзи бошқариш органи ишларига муносиб ҳисса қўшиб келаётган 36 нафар фаол ва ташаббускор фуқаро ҳамда жамоатчилик тузилмалари вакиллари муносиб кўрилди.
«Маҳалла ифтихори» кўкрак нишони билан тақдирланган фуқароларни вилоят ҳокими Ш.Ғаниев қутлади ва уларни ўз эгаларига тантанали топширди.
– Бош қомусимиз байрами арафасида бу мукофот билан тақдирланганимиз бизга алоҳида масъулият юклайди, – дейди Қўқон шаҳридаги «Қаймоқли гузар» маҳалла фуқаролар йиғини раиси Матлуба Содиқова. – Бугун юртимизда маҳалла тизимига катта эътибор қаратилмоқда. Маҳалламизда истиқомат қилаётган 3 мингга яқин аҳоли барча ишларда фаол. Ўтган уч йил давомида ҳудудимизда бирорта жиноят содир этилмади. Маҳалла фаоллари билан бамаслаҳат иш юритаётганимиз бунда муҳим ўрин тутмоқда.
Изоҳ (0)