Fuqaro Rahimbergan Avazov nomidan O‘zbekiston Milliy axborot agentligi — O‘zAga murojaat yo‘lladi, deb yozmoqda agentlik.
Murojaatga ko‘ra, pensioner Rahimbergan Avazov Xorazm viloyati Urganch tumani Chakka-sholikor qishloqning Oq o‘rik mahallasida istiqomat qiladi. O‘g‘li Mirzohid Avazov hunarmand. Zargarlik buyumlari yasash, ta’mirlash ishlari bilan shug‘ullanadi. Lekin oxirgi paytlarda ustaxona uchun ijara haqi to‘lovi qimmatligi va boshqa sabablarga ko‘ra bu hunar bilan shug‘ullanmay qo‘ydi. Kelini uy bekasi, ishsiz.
Bu oila joriy yil fevral—mart oylarida besh mingga yaqin aholi istiqomat qiladigan Oq o‘rik mahallasida kitob do‘koni ochishni maqsad qiladi. Do‘kon qurilishi uchun yer ajratish to‘g‘risida tuman hokimligiga qilgan murojaati amaliy natija bermaydi.
Agentlik Rahimbergan Avazovning agentlikka oktyabr oyida shu masala yuzasidan qilgan murojaati bo‘yicha vaziyatni o‘rganishga harakat qilgan.
“Ikki yil davomida Xiva shahrida zargarlik bilan shug‘ullanuvchi hunarmand ustalardan hunar o‘rgandim, — deydi murojaatchining o‘g‘li Mirzohid Avazov. — Shundan so‘ng Urganch shahrida o‘z ustaxonamni ochdim. Boshida ishlarim yaxshi edi. Oilali bo‘ldim, farzandimiz tug‘ildi. Yaxshi tashvishlar bilan birga xarajatlar ortmoqda. Bu jarayonda ba’zi sabablarga ko‘ra, ustaxonamda ish to‘xtagani yaxshi bo‘lmadi. Moddiy ta’minot bo‘lmasa yaxshi emas. Otam bilan o‘ylay-o‘ylay qo‘limizda to‘plangan ozroq mablag‘ni biror tadbirkorlikka yo‘naltirmoqchi bo‘ldik. Kitob do‘koni ochishga qaror qildik. Bu qarorga kelishimizga sabab, mahallamizda bunday do‘kon yo‘q edi. Bu bir tomondan savdo yaxshi bo‘lishini anglatsa, boshqa tomondan xayrli ish. Shuningdek, savdosida kitoblar ulushi ma’lum foizdan ko‘p bo‘lgan tadbirkorlik sub’ektiga soliq to‘lovlarida ham imtiyozlar berilgan”.
Oilaviy tadbirkorlikni boshlash uchun esa, avvalo, yer ajratilishi, do‘kon qurilishi lozim. Buning uchun dastlabki qadam tashlangan edi. Joriy yil 1-mart kuni Oq o‘rik mahallasi hududidan 100—120 metr kvadrat yer berishini so‘rab, Urganch tumani hokimi nomiga ariza bilan murojaat qilgan.
“Shundan so‘ng, kutish va ovoragarchiliklar boshlandi, — deydi Rahimbergan Avazov. — Kutib o‘tirgan bilan ish bitmaydi. Ishlash kerak, ro‘zg‘orni tebratish lozim. O‘g‘lim murojaatning ortidan vaqt o‘tkazib idorama-idora yurmasin, biror ish bilan shug‘ullansin, deb bu ishga o‘zim kirishdim. Muammo shundaki, tumanimizning o‘sha davrdagi hokimi O. Bekchanov qabuliga bir necha bor kirdim. Har safar hokim menga yordam qilishini aytib, va’da bergan. Yo‘q demagan. Tuman arxitekturasi boshlig‘iga bir necha bor bu borada topshiriq ham berdi. Unga ko‘ra, tuman arxitekturasi menga xat jo‘natdi. Xatda yozilishicha, O‘zbekiston Respublikasi Vazirlar Mahkamasining 2015-yil 7-oktabrdagi “Tadbirkorlik faoliyatini amalga oshirish uchun tanlov asosida yer uchastkalari berish tartibotlarini va qurilish uchun ruxsatnomalar olish tartibini yanada takomillashtirish chora-tadbirlari to‘g‘risida”gi qaroriga asosan Urganch tumani hududida tanlovga qo‘yiladigan obyektlardan yer maydoni olishim mumkinligi bildirilgan. Ammo bir necha bor urinishimga qaramay, tuman arxitektura va qurilish bo‘limi xodimlari menga tanlovga qo‘yiladigan obyektlar ro‘yxatini bermadi”.
Oradan oylar o‘tdi. Bu orada Avazovlar oilasi yana bir qancha vazirlik, davlat va jamoat tashkilotlari, huquqiy idoralar hamda ommaviy axborot vositalariga murojaat qiladi. Biroq, natija bo‘lmadi.
Joriy yil oktabr oyida bu masala bo‘yida O‘zAga qilingan murojaat asosida Urganch tuman hokimligi mas’ul vakillariga asl holat yuzasidan izoh berilishini so‘radik. Og‘zaki murojaatimizga tuman hokimi vazifasini bajaruvchi Frunze Sharipov imzosi bilan ma’lumotnoma taqdim etildi. Afsuski, hokimlikning ma’lumotidan masala nima uchun hal etilmayotgani yoki mavzuga doir boshqa ma’lumotlar ololmadik, deyiladi O‘zA xabarida.
Fuqaro murojaati hanuz hal bo‘lmagan. Nega? Urganch tumani hokimligi mutasaddilari nima uchun murojaatga bu qadar bee’tibor munosabatda bo‘lmoqda? Mamlakatimizda yaratilayotgan sharoit va imkoniyatlardan foydalanib, tadbirkorlik bilan shug‘ullanish istagini bildirgan fuqaro murojaati hal bo‘ladimi, yo‘qmi, deya yakunkanadi agentlik xabari.
Izoh (0)