Фуқаро Раҳимберган Авазов номидан Ўзбекистон Миллий ахборот агентлиги — ЎзАга мурожаат йўллади, деб ёзмоқда агентлик.
Мурожаатга кўра, пенсионер Раҳимберган Авазов Хоразм вилояти Урганч тумани Чакка-шоликор қишлоқнинг Оқ ўрик маҳалласида истиқомат қилади. Ўғли Мирзоҳид Авазов ҳунарманд. Заргарлик буюмлари ясаш, таъмирлаш ишлари билан шуғулланади. Лекин охирги пайтларда устахона учун ижара ҳақи тўлови қимматлиги ва бошқа сабабларга кўра бу ҳунар билан шуғулланмай қўйди. Келини уй бекаси, ишсиз.
Бу оила жорий йил февраль—март ойларида беш мингга яқин аҳоли истиқомат қиладиган Оқ ўрик маҳалласида китоб дўкони очишни мақсад қилади. Дўкон қурилиши учун ер ажратиш тўғрисида туман ҳокимлигига қилган мурожаати амалий натижа бермайди.
Агентлик Раҳимберган Авазовнинг агентликка октябр ойида шу масала юзасидан қилган мурожаати бўйича вазиятни ўрганишга ҳаракат қилган.
«Икки йил давомида Хива шаҳрида заргарлик билан шуғулланувчи ҳунарманд усталардан ҳунар ўргандим, — дейди мурожаатчининг ўғли Мирзоҳид Авазов. — Шундан сўнг Урганч шаҳрида ўз устахонамни очдим. Бошида ишларим яхши эди. Оилали бўлдим, фарзандимиз туғилди. Яхши ташвишлар билан бирга харажатлар ортмоқда. Бу жараёнда баъзи сабабларга кўра, устахонамда иш тўхтагани яхши бўлмади. Моддий таъминот бўлмаса яхши эмас. Отам билан ўйлай-ўйлай қўлимизда тўпланган озроқ маблағни бирор тадбиркорликка йўналтирмоқчи бўлдик. Китоб дўкони очишга қарор қилдик. Бу қарорга келишимизга сабаб, маҳалламизда бундай дўкон йўқ эди. Бу бир томондан савдо яхши бўлишини англаца, бошқа томондан хайрли иш. Шунингдек, савдосида китоблар улуши маълум фоиздан кўп бўлган тадбиркорлик субъэктига солиқ тўловларида ҳам имтиёзлар берилган».
Оилавий тадбиркорликни бошлаш учун эса, аввало, ер ажратилиши, дўкон қурилиши лозим. Бунинг учун дастлабки қадам ташланган эди. Жорий йил 1 март куни Оқ ўрик маҳалласи ҳудудидан 100—120 метр квадрат ер беришини сўраб, Урганч тумани ҳокими номига ариза билан мурожаат қилган.
«Шундан сўнг, кутиш ва оворагарчиликлар бошланди, — дейди Раҳимберган Авазов. — Кутиб ўтирган билан иш битмайди. Ишлаш керак, рўзғорни тебратиш лозим. Ўғлим мурожаатнинг ортидан вақт ўтказиб идорама-идора юрмасин, бирор иш билан шуғуллансин, деб бу ишга ўзим киришдим. Муаммо шундаки, туманимизнинг ўша даврдаги ҳокими О. Бекчанов қабулига бир неча бор кирдим. Ҳар сафар ҳоким менга ёрдам қилишини айтиб, ваъда берган. Йўқ демаган. Туман архитектураси бошлиғига бир неча бор бу борада топшириқ ҳам берди. Унга кўра, туман архитектураси менга хат жўнатди. Хатда ёзилишича, Ўзбекистон Республикаси Вазирлар Маҳкамасининг 2015 йил 7 октябрдаги «Тадбиркорлик фаолиятини амалга ошириш учун танлов асосида ер участкалари бериш тартиботларини ва қурилиш учун рухсатномалар олиш тартибини янада такомиллаштириш чора-тадбирлари тўғрисида»ги қарорига асосан Урганч тумани ҳудудида танловга қўйиладиган объектлардан ер майдони олишим мумкинлиги билдирилган. Аммо бир неча бор уринишимга қарамай, туман архитектура ва қурилиш бўлими ходимлари менга танловга қўйиладиган объектлар рўйхатини бермади».
Орадан ойлар ўтди. Бу орада Авазовлар оиласи яна бир қанча вазирлик, давлат ва жамоат ташкилотлари, ҳуқуқий идоралар ҳамда оммавий ахборот воситаларига мурожаат қилади. Бироқ, натижа бўлмади.
Жорий йил октябрь ойида бу масала бўйида ЎзАга қилинган мурожаат асосида Урганч туман ҳокимлиги масъул вакилларига асл ҳолат юзасидан изоҳ берилишини сўрадик. Оғзаки мурожаатимизга туман ҳокими вазифасини бажарувчи Фрунзе Шарипов имзоси билан маълумотнома тақдим этилди. Афсуски, ҳокимликнинг маълумотидан масала нима учун ҳал этилмаётгани ёки мавзуга доир бошқа маълумотлар ололмадик, дейилади ЎзА хабарида.
Фуқаро мурожаати ҳануз ҳал бўлмаган. Нега? Урганч тумани ҳокимлиги мутасаддилари нима учун мурожаатга бу қадар бееътибор муносабатда бўлмоқда? Мамлакатимизда яратилаётган шароит ва имкониятлардан фойдаланиб, тадбиркорлик билан шуғулланиш истагини билдирган фуқаро мурожаати ҳал бўладими, йўқми, дея якунканади агентлик хабари.
Изоҳ (0)