“O‘zbekneftgaz” avtomobillarga siqilgan gaz quyish shoxobchalaridagi gaz tanqisligiga barham berish maqsadida qo‘shimcha chora-tadbirlarni amalga oshirmoqda. Bu haqda bugun, 29-noyabr kuni kuni “Taraqqiyot strategiyasi” markazida “O‘zbekneftgaz” aksiyadorlik faoliyatining 2018-yildagi faoliyati sarhisobiga bag‘ishlangan matbuot anjumanida ma’lum qilindi, deb xabar berdi “Daryo” muxbiri Sevara Nishonova.
“Xabaringiz bor, O‘zbekiston Respublikasi Vazirlar Mahkamasining 2018-yil 1-noyabrdagi 897-sonli ‘Yoqilg‘i-energetika resurslarining narx va tariflarini bosqichma-bosqich o‘zgartirish to‘g‘risida’gi qaroriga asosan butun respublika iste’molchilariga asosan tariflar belgilandi. Avtomobillarga gaz quyish shoxobchalariga tabiiy gaz aholi narxida yetkazib berilgan bo‘lsa, buning ustida qariyb 500 so‘m ustama haqlari bo‘lar edi. Hozir bizda narx oshgan bo‘lsa narx 10 so‘mga oshdi.
Avtomobillarga gaz quyish shoxobchalarida gaz tanqisligining oldini olish maqsadida ‘O‘zbekneftgaz’ aksiyadorlik jamiyati tomonidan noyabr oyi uchun qo‘shimcha 40 million metr kub gaz qo‘shib berildi. Bu faqat avtomobillarga siqilgan gaz quyish shoxobchalari uchun. Mana shu ko‘rilgan choralar natijasida metan gaz narxi 1800-1900 so‘mga tushdi. Bu yerda biroz tushunmovchilik bo‘ldi, shuning uchun tezkorlik bilan qo‘shimcha limitlar ajratildi. Kelgusi oylarda ham bu yo‘nalishlardagi ishlar davom ettiriladi. Aholiga zarar bo‘layotgan taraflarni qo‘llamaslik maqsadida tegishli qonunga o‘zgartirishlar kiritish bo‘yicha ishlar olib borilyapti”, — deydi “O‘ztransgaz” aksiyadorlik jamiyati gaz tarmoqlaridan va qurilmalardan foydalanish boshqarmasi boshlig‘i Akmal Eshonqulov.
“O‘zbekneftgaz” aksiyadorlik jamiyati boshqaruv raisi o‘rinbosari Odil Temirov quyidagilarni qo‘shimcha qildi:
“Biz ham o‘rganish olib borganmiz. Avtomobilga siqilgan gaz quyish shoxobchasini ochgan tadbirkorning davlatdan olgan krediti, ishchilarga to‘layotgan oyliklari, to‘layotgan soliqlari va kreditni qaytarish stavkalari, foizlari va o‘zining rentabelligi 10 foiz darajani tashkil qilgan taqdirda ham gaz narxi 1700—1800 so‘m atrofida bo‘lishini biz ham hisob-kitob qilib ko‘rganmiz.
2017-yilda biz avtomobillarga siqilgan gaz quyish shoxobchalariga 2,5 milliard kub metr gaz yetkazib bergan bo‘lsak, 2018-yilda bu 2,7 milliard kub metr gaz, keyingi yilda 3 milliard kub metrdan ko‘proq gaz ajratib berilmoqda. Sababi, bu ham biz uchun kerak bo‘lgan narsa. Ta’kidlanganidek, avtomobillarga siqilgan gaz quyish shoxobchalari juda ko‘p miqdordagi benzin o‘rnini qoplayapti”.
Izoh (0)