«Ўзбекнефтгаз» автомобилларга сиқилган газ қуйиш шохобчаларидаги газ танқислигига барҳам бериш мақсадида қўшимча чора-тадбирларни амалга оширмоқда. Бу ҳақда бугун, 29 ноябрь куни куни «Тараққиёт стратегияси» марказида «Ўзбекнефтгаз» акциядорлик фаолиятининг 2018 йилдаги фаолияти сарҳисобига бағишланган матбуот анжуманида маълум қилинди, деб хабар берди «Дарё» мухбири Севара Нишонова.
«Хабарингиз бор, Ўзбекистон Республикаси Вазирлар Маҳкамасининг 2018 йил 1 ноябрдаги 897-сонли ‘Ёқилғи-энергетика ресурсларининг нарх ва тарифларини босқичма-босқич ўзгартириш тўғрисида’ги қарорига асосан бутун Pеспублика истеъмолчиларига асосан тарифлар белгиланди. Автомобилларга газ қуйиш шохобчаларига табиий газ аҳоли нархида етказиб берилган бўлса, бунинг устида қарийб 500 сўм устама ҳақлари бўлар эди. Ҳозир бизда нарх ошган бўлса нарх 10 сўмга ошди.
Автомобилларга газ қуйиш шохобчаларида газ танқислигининг олдини олиш мақсадида ‘Ўзбекнефтгаз’ акциядорлик жамияти томонидан ноябрь ойи учун қўшимча 40 миллион метр куб газ қўшиб берилди. Бу фақат автомобилларга сиқилган газ қуйиш шохобчалари учун. Мана шу кўрилган чоралар натижасида метан газ нархи 1800-1900 сўмга тушди. Бу ерда бироз тушунмовчилик бўлди, шунинг учун тезкорлик билан қўшимча лимитлар ажратилди. Келгуси ойларда ҳам бу йўналишлардаги ишлар давом эттирилади. Аҳолига зарар бўлаётган тарафларни қўлламаслик мақсадида тегишли қонунга ўзгартиришлар киритиш бўйича ишлар олиб бориляпти», — дейди «Ўзтрансгаз» акциядорлик жамияти газ тармоқларидан ва қурилмалардан фойдаланиш бошқармаси бошлиғи Акмал Эшонқулов.
«Ўзбекнефтгаз» акциядорлик жамияти бошқарув раиси ўринбосари Одил Темиров қуйидагиларни қўшимча қилди:
«Биз ҳам ўрганиш олиб борганмиз. Автомобилга сиқилган газ қуйиш шохобчасини очган тадбиркорнинг давлатдан олган кредити, ишчиларга тўлаётган ойликлари, тўлаётган солиқлари ва кредитни қайтариш ставкалари, фоизлари ва ўзининг рентабеллиги 10 фоиз даражани ташкил қилган тақдирда ҳам газ нархи 1700—1800 сўм атрофида бўлишини биз ҳам ҳисоб-китоб қилиб кўрганмиз.
2017 йилда биз автомобилларга сиқилган газ қуйиш шохобчаларига 2,5 миллиард куб метр газ етказиб берган бўлсак, 2018 йилда бу 2,7 миллиард куб метр газ, кейинги йилда 3 миллиард куб метрдан кўпроқ газ ажратиб берилмоқда. Сабаби, бу ҳам биз учун керак бўлган нарса. Таъкидланганидек, автомобилларга сиқилган газ қуйиш шохобчалари жуда кўп миқдордаги бензин ўрнини қоплаяпти».
Изоҳ (0)