Jizzax viloyatida 25-noyabrdan 25-dekabrgacha “Kuz-qish mavsumida sodir bo‘lishi mumkin bo‘lgan favqulodda vaziyatlarning oldini olish oyligi” e’lon qilindi. Bu haqda O‘zA xabar berdi.
Bu masalada viloyat hokimining “2018—2019-yillar kuz-qish mavsumida sodir bo‘lishi mumkin bo‘lgan favqulodda vaziyatlar, jumladan, is gazi va ovqatlanishdan zaharlanish, gaz-havo aralashmasi chaqnashi hamda qutirish kasalligiga qarshi profilaktik tadbirlar samaradorligini oshirish chora-tadbirlari to‘g‘risida"gi qarori qabul qilindi.
Kuz faslining so‘nggi oyida haroratning keskin tushishi bilan ayrim aholi yashash joylarida tabiiy gaz bosimining pastligi va elektr energiyasidagi uzilishlar nostandart isitish vositalaridan foylanishga sabab bo‘lmoqda.
Yilning o‘tgan davrida viloyatda is gazidan zaharlanish hamda gaz-havo aralashmasi portlashi bilan bog‘liq 25 ta favqulodda hodisa sodir bo‘lgan. Bu shunday hodisalar o‘tgan yilning shu davriga nisbatan 6 taga yoki 30 foizga ko‘payganini anglatadi.
Insonlar jabr ko‘radigan, katta moddiy va ma’naviy zarar keltirib chiqaradigan bunday ko‘ngilsiz hodisalarga aksariyat holatlarda xonadon va muassasalarda xavfsizlik qoidalariga rioya qilmaslik sabab bo‘lmoqda.
O‘zbekiston Respublikasi Vazirlar Mahkamasining 2018-yil 1-noyabrdagi "Aholi xonadonlarida isitish tizimi va yoqilg‘i mahsulotlaridan foydalanishda xavfsizlik talablariga rioya etilishini ta’minlash chora-tadbirlari to‘g‘risida”gi qaroriga muvofiq, joylardagi vaziyat o‘rganib chiqilib, ko‘ngilsiz hodisalarning oldini olish bo‘yicha ichki ishlar, yong‘in xavfsizligi xizmati, favqulodda vaziyatlar, soliq xizmatlari tomonidan tegishli choralar ko‘rilmoqda.
Bunday hodisalarning oldini olishda, avvallo, tabiiy gaz va elektr energiyasi ta’minotidagi kamchiliklarni bartaraf etish zarur. Ammo, barcha aholi manzillari ham gaz, elektr energiyasi bilan to‘liq ta’minlangan, deb bo‘lmaydi. Bu energiya resurslari ta’minoti, taqsimoti va undan to‘g‘ri foydalanish ustidan nazoratni kuchaytirish, isitish mavsumida birinchi navbatda, aholi xonadonlari va ijtimoiy muassasalarni issiqlik bilan ta’minlashga e’tiborni yanada kuchaytirishni taqozo etmoqda. Ayniqsa, bolalar muassasalarida favqulodda vaziyatlarning oldini olish alohida e’tibor talab etadi. Afsuski, bu sohada ham ahvol qoniqarli emas.
Yong‘in xavfsizligi xodimlari tomonidan o‘rganishlar davomida xalq ta’limiga qarashli 538 ta muassasaning 277 tasida yong‘indan xabarlash signalizatsiyasi o‘rnatilmagani, 116 tasida nosoz holatda ekani, 248 ta maktab esa birlamchi yong‘in o‘chirish vositalari bilan ta’minlanmagani aniqlandi. Hududda shunday kamchiliklar maktabgacha ta’lim boshqarmasi tizimidagi muassasalarda ham mavjud. Boshqarmaga tegishli 169 ta muassasaning 95 tasida signalizatsiya yo‘q. 81 ta inshoot birlamchi o‘t o‘chirish jihozlari bilan ta’minlanmagan. Jizzax davlat pedagogika, Jizzax politexnika institutlarida, o‘rta maxsus ta’lim boshqarmasiga qarashli 80 ta ob’ektning 21 tasida signalizatsiya yo‘q bo‘lsa, 22 tasida nosoz holatda.
Gaz va elektr energiyasidagi yetishmovchiliklar qo‘lbola isitish vositalaridan foydalanishning ko‘payishiga olib keladi. Yong‘in, gazdan, isdan zaharlanishga sabab bo‘luvchi nostandart isitish vositalarini esa istalgan bozordan topish mumkin.
Viloyat davlat soliq boshqarmasi va huquqni muhofaza qilish idoralari, jamoatchilik vakillaridan tuzilgan ishchi guruhlar tomonidan aholi o‘rtasida nostandart isitish vositalari yasash, sotish va foydalanishning oldini olishga qaratilgan profilaktik tushuntirish ishlari olib borilmoqda. Biroq, aholi salomatligiga xavf solayotgan qo‘lbola isitish moslamalarini sotish holatlari hamon uchramoqda.
Kuz-qish mavsumini betalafot o‘tkazish barcha sohada belgilangan tartib va qoidalarga qa’tiy rioya qilishga, mas’uliyatni chuqur his etishga bog‘liq. Shundan kelib chiqib, viloyat hokimi qarori bilan kuz-qish mavsumida sodir bo‘lishi mumkin bo‘lgan favqulodda vaziyatlarning oldini olish oyligi tashkil etildi.
Izoh (0)