O‘zbekiston – Chexiya: parlamentlararo hamkorlik rivojlanmoqda

O‘zbekiston Respublikasi Oliy Majlisi Qonunchilik palatasida 27-noyabr kuni Chexiya Respublikasi Parlamenti Deputatlar palatasi raisining o‘rinbosari Filip Voytex boshchiligidagi delegatsiya a’zolari bilan uchrashuv bo‘lib o‘tdi. Bu haqda O‘zA xabar bermoqda.

Uchrashuvda ikki davlat o‘rtasidagi parlamentlararo hamkorlikka doir masalalar muhokama qilindi.

Oliy Majlis Qonunchilik palatasi Spikeri o‘rinbosari Sarvar Otamuratov mehmonlarga yurtimizda barqaror rivojlanish hamda xalq manfaatlarini ta’minlash yo‘lida olib borilayotgan keng ko‘lamli islohotlar, ushbu jarayonlarda qonun ijodkorligining ahamiyati, Qonunchilik palatasi faoliyati haqida so‘zlab berdi.

O‘zbekiston bilan Chexiya o‘rtasida diplomatik aloqalar 1993-yilda o‘rnatilgan. Bu ikki davlat o‘rtasida turli sohalardagi hamkorlik munosabatlarini rivojlantirish imkonini bermoqda.

Prezident Shavkat Mirziyoyev rahbarligida O‘zbekistonning yaqin qo‘shni va Yevropadagi hamkor davlatlar bilan do‘stlik, o‘zaro ishonch va manfaatli sheriklik tamoyillariga asoslangan aloqalari tobora mustahkamlanib borayotgani alohida qayd etildi. Bu, o‘z navbatida, qonun ijodkorligi, parlamentlararo do‘stlik guruhlari faoliyatini amaliy mazmun bilan boyitishga zamin yaratmoqda.

Filip Voytex mamlakatda barqaror rivojlanish yo‘lida olib borilayotgan ichki va tashqi siyosat, keng ko‘lamli islohotlar o‘zining ijobiy samaralarini berayotgani borasida fikr bildirdi. Parlamentarizm sohasidagi hamkorlik aloqalarini yanada rivojlantirish ikki tomon uchun birdek manfaatli ekanini qayd etdi. Bunda faoliyat olib borayotgan “Chexiya – Janubiy Kavkaz va Markaziy Osiyo mamlakatlari” do‘stlik guruhi imkoniyatlaridan samarali foydalanish zarurligini ta’kidladi.

Muloqotda, shuningdek, O‘zbekiston bilan Chexiya o‘rtasida savdo-iqtisodiy, siyosiy, madaniy-gumanitar sohalardagi manfaatli sheriklikni qo‘llab-quvvatlash masalalari muhokama qilindi.

Uchrashuvda ikki mamlakat qonun chiqaruvchi organlari o‘rtasida nazorat-tahlil faoliyati yuzasidan tajriba almashish, bu borada istiqbolli loyihalarni amalga oshirishga kelishib olindi.

Shu kuni Chexiya delegatsiyasi a’zolari O‘zbekistondagi qator idora va vazirliklarda ham bo‘lib, hamkorlikka oid muzokaralarda ishtirok etdi.