Фарғона вилоятида жорий йилнинг ўтган 10 ойида 668 нафар хотин-қиз томонидан 603 та жиноят содир этилган. Бағдод, Данғара, Бувайда ва Ёзёвон туманида аёллар ўртасидаги жиноятчилик сони ошган, дея хабар бермоқда ЎзА.
Фарғона тумани «Юқори гулшан» маҳалла фуқаролар йиғинида бўлиб ўтган сайёр суд мажлисида Ёқут Асилеванинг жиноят иши кўрилди.
Судланувчи 2018 йил 11 сентябрь куни соат 14.30 ларда Фарғона тумани «Ҳувайдо» маҳалласида бўлаётган тўй маросимига кириб, у ерда 2017 йилда туғилган О.Шерматовани ташқарига олиб чиқиб кетади. «Damas» русумли йўловчи автомашинада одамлар эътиборидан четроқ овлоқ жойга олиб келиб, унинг қулоқларидаги нархи 200 минг сўм бўлган бир жуфт тилла сирғани ечиб олади.
О.Шерматовани хавфли аҳволга солиб қўйиб, кўчада қолдириб, воқеа жойидан яширинади. Ички ишлар идоралари ходимлари томонидан мазкур жиноят фош этилди.
Жиноят ишлари бўйича Фарғона туман суди раиси Ф. Абдураимов томонидан ўтказилган кенг жамоатчилик иштирокидаги сайёр судда Ёқут Асилеванинг ана шу қилмишлари атрофлича кўриб чиқилди. Унга 5 йил озодликни чеклаш билан боғлиқ жазо тайинланди.
Изоҳ (0)