Rossiya prezidenti Vladimir Putinning davlat tashrifi mobaynida joriy yilning 19-oktabrda imzolangan O‘zbekiston Respublikasi atom energetikasi sohasida kadrlarni o‘qitish va tayyorlash hamkorligi to‘g‘risidagi Rossiya—O‘zbek Memorandumi doirasida amaliy qadamlar qo‘yilmoqda. Bu haqda “O‘zatom” agentligi matbuot xizmati xabar berdi.
Joriy yilning 14—15-noyabrda Moskva shahrida “O‘zatom” agentligi bosh direktori Jo‘rabek Mirzamahmudov boshchiligidagi O‘zbekiston Respublikasi delegatsiyasining tashrifi mobaynida, jumladan, O‘zbekiston atom tarmog‘i uchun kadrlarni tayyorlashni tashkil etish masalalari muhokama qilingan.
Xususan, bu haqida AESni qurilish bo‘yicha o‘zbek loyihasining mutasaddi shaxsi sifatida tayinlangan “Rosatom” davlat korporatsiyasining operatsion boshqaruv bo‘yicha bosh direktorning birinchi o‘rinbosari Aleksandr Lokshin bilan uchrashuvda so‘z yuritilgan.
Hozirgi kunda O‘zbekiston milliy universiteti huzurida 100 abiturentlar ta’lim olayotgan maxsus tashkil etilgan kurslar faoliyat ko‘rsatmoqda. Uchrashuvda yaqin orada “Moskva muhandislik-fizika instituti” Milliy tadqiqot yadro universiteti (“MMFI” MTYaU) dan mazkur o‘quvchilarning bilimlarini tekshirish uchun mutaxassislar yuborilishi haqida kelishuvga erishildi.
Shuningdek, mazkur mutaxassislarning kelishidan maqsad MMFI Toshkent filialida professor-o‘qituvchilarni shakllantirish uchun o‘qituvchilarni qayta tayyorlash va ularning malakasini oshirish borasida o‘qituvchilarni tanlab olishdan iborat.
Tashrif doirasida O‘zbekiston Respublikasi delegatsiyasinig universitet rektori Mixail Strixanov boshchiligida “MMFI” MTYaU rahbariyati hamda mazkur OTMga o‘qitish uchun yuborilgan O‘zbekiston talabalari bilan uchrashuv bo‘lib o‘tdi.
Delegatsiya O‘zbekiston talabalari tomonidan kursni o‘zlashtirganligi va ularning davomati bilan tanishdi, yashash va o‘qish sharoitlari muhokama qilindi. Shu bilan birga doimiy muloqot qilish, yuzaga kelayotgan muammolarni yechishda ko‘maklashish hamda ishlab chiqarish amaliyotini tashkil etish va ularni kursni bitirgandan keyin ishga joylashtirish bo‘yicha kelishuvga erishildi.
Hozirgi kunda MMFIda 39 nafar O‘zbekiston talabalari, shundan 22 ta bakalavriatda, 16 ta magistraturada va 1 ta maxsus kurs (spetsialitet)da o‘qimoqda. Mazkur talabalar O‘zbekiston Respublikasi Fanlar Akademiyasi tomonidan (12 nafar) va O‘zbekiston Respublikasi Oliy va o‘rta maxsus ta’lim vazirligi tomonidan (15ta talaba) saralab o‘qishga yuborilgan hamda Rossiya hamkorligi doirasida o‘z kuchi bilan kirgan 12 talabalar. Barcha talabalar grant asosida o‘qimoqda.
MMFI rektori ham O‘zbekistondan kelgan talabalarga yuzaga kelayotgan o‘quv va maishiy masalalarni yechishda ko‘maklashishga va’da berdi.
Universitet rektori M.Strixanov bilan uchrashuvda Toshkent shahrida “MMFI” MTYaU filialini tashkil etish masalalari hamda “O‘zatom” agentligi, O‘zbekiston Respublikasi Fanlar akademiyasi va “Rosatom” davlat korporatsiyasi o‘rtasida O‘zbekiston Respublikasi atom energetikasi sohasida kadrlarni o‘qitish va tayyorlash bo‘yicha hamkorlik qilish va o‘zaro tushunish memorandumini amalga oshirish bo‘yicha “Yo‘l xaritasi” loyihasi muhokama qilindi.
Joriy yilning dekabr oyida Toshkent shahrida ekspertlarning keyingi ishchi uchrashuvini o‘tkazish hamda maktab o‘quvchilari va OTM talabalari o‘rtasida “Rosatom” davlat korporatsiyasi olimpiadasini tashkil etish va o‘tkazish to‘g‘risida kelishuvga erishildi.
Darhaqiqat, mazkur memorandum Rossiya Federatsiyasi va O‘zbekiston Respublikasi hukumatlari o‘rtasida 2017-yil 29-dekabrdagi tinchlik maqsadida atom energiyasidan foydalanish sohasida hamkorlik qilish va 2018-yil 7-sentabrdagi O‘zbekiston Respublikasi hududida elektr stansiyani qurishda hamkorlik qilish kelishuvlariga amal qilgan holda imzolangan.
Memorandum doirasida tomonlar O‘zbekistonda ilk atom elektr stansiyasi uchun operatsion xodimlarni o‘qitish va tayyorlash hamda butun atom energetika va tutash sohalarda xodimlarga ta’lim berish va ularni tayyorlash sohasida hamkorlikni amalga oshirishni rejalashtirdi.
Shuningdek, atom energetikasi va tutash sohalari, shu jumladan yadro fani va texnologiyalar ehtiyojlaridan kelib chiqib, qo‘shma ta’lim dasturlari, shu jumladan ikkita diplomlar dasturlarini tashkil etish rejalashtirildi.
Tomonlar O‘zbekiston Respublikasi o‘qituvchilarini O‘zbekiston universitetlari, ta’lim muassasalari hamda boshqa korxona va tashkilotlarda o‘quv kurslarini tashkil qilishni rejalashtirgan.
Memorandum atom energetikasi sohasida o‘quv va ilmiy adabiyotlarni ishlab chiqish, qisqa muddatli tajribani orttirish, yozgi maktab, seminarlarni tashkil etish, O‘zbekiston Respublikasining talaba va maktab o‘quvchilari o‘rtasida fizika, kimyo, matematika bo‘yicha tanlovlarni o‘tkazish kabi boshqa hamkorlik yo‘nalishlarini ham nazarda tutadi.
Atom tarmog‘ida mutaxassislarni tayyorlash masalalarini muhokama qilish uchun anjuman, seminarlarni, shu jumladan, xalqaro ekspertlar ishtirokida o‘tkazish nazarda tutilmoqda.
Shu bilan birga,tomonlar Rossiya universitetlarida O‘zbekiston mutaxassislari uchun oliy ta’lim dasturlarini amalga oshirishda ko‘maklashadi.
Izoh (0)