Россия президенти Владимир Путиннинг давлат ташрифи мобайнида жорий йилнинг 19 октябрда имзоланган Ўзбекистон Республикаси атом энергетикаси соҳасида кадрларни ўқитиш ва тайёрлаш ҳамкорлиги тўғрисидаги Россия—Ўзбек Меморандуми доирасида амалий қадамлар қўйилмоқда. Бу ҳақда «Ўзатом» агентлиги матбуот хизмати хабар берди.
Жорий йилнинг 14—15 ноябрда Москва шаҳрида «Ўзатом» агентлиги бош директори Жўрабек Мирзамаҳмудов бошчилигидаги Ўзбекистон Республикаси делегациясининг ташрифи мобайнида, жумладан, Ўзбекистон атом тармоғи учун кадрларни тайёрлашни ташкил этиш масалалари муҳокама қилинган.
Хусусан, бу ҳақида АЭСни қурилиш бўйича ўзбек лойиҳасининг мутасадди шахси сифатида тайинланган «Росатом» давлат корпорациясининг операцион бошқарув бўйича бош директорнинг биринчи ўринбосари Александр Локшин билан учрашувда сўз юритилган.
Ҳозирги кунда Ўзбекистон миллий университети ҳузурида 100 абитурентлар таълим олаётган махсус ташкил этилган курслар фаолият кўрсатмоқда. Учрашувда яқин орада «Москва муҳандислик-физика институти» Миллий тадқиқот ядро университети («ММФИ» МТЯУ) дан мазкур ўқувчиларнинг билимларини текшириш учун мутахассислар юборилиши ҳақида келишувга эришилди.
Шунингдек, мазкур мутахассисларнинг келишидан мақсад ММФИ Тошкент филиалида профессор-ўқитувчиларни шакллантириш учун ўқитувчиларни қайта тайёрлаш ва уларнинг малакасини ошириш борасида ўқитувчиларни танлаб олишдан иборат.
Ташриф доирасида Ўзбекистон Республикаси делегациясиниг университет ректори Михаил Стриханов бошчилигида «ММФИ» МТЯУ раҳбарияти ҳамда мазкур ОТМга ўқитиш учун юборилган Ўзбекистон талабалари билан учрашув бўлиб ўтди.
Делегация Ўзбекистон талабалари томонидан курсни ўзлаштирганлиги ва уларнинг давомати билан танишди, яшаш ва ўқиш шароитлари муҳокама қилинди. Шу билан бирга доимий мулоқот қилиш, юзага келаётган муаммоларни ечишда кўмаклашиш ҳамда ишлаб чиқариш амалиётини ташкил этиш ва уларни курсни битиргандан кейин ишга жойлаштириш бўйича келишувга эришилди.
Ҳозирги кунда ММФИда 39 нафар Ўзбекистон талабалари, шундан 22 та бакалавриатда, 16 та магистратурада ва 1 та махсус курс (специалитет)да ўқимоқда. Мазкур талабалар Ўзбекистон Республикаси Фанлар Академияси томонидан (12 нафар) ва Ўзбекистон Республикаси Олий ва ўрта махсус таълим вазирлиги томонидан (15та талаба) саралаб ўқишга юборилган ҳамда Россия ҳамкорлиги доирасида ўз кучи билан кирган 12 талабалар. Барча талабалар грант асосида ўқимоқда.
ММФИ ректори ҳам Ўзбекистондан келган талабаларга юзага келаётган ўқув ва маиший масалаларни ечишда кўмаклашишга ваъда берди.
Университет ректори М.Стриханов билан учрашувда Тошкент шаҳрида «ММФИ» МТЯУ филиалини ташкил этиш масалалари ҳамда «Ўзатом» агентлиги, Ўзбекистон Республикаси Фанлар академияси ва «Росатом» давлат корпорацияси ўртасида Ўзбекистон Республикаси атом энергетикаси соҳасида кадрларни ўқитиш ва тайёрлаш бўйича ҳамкорлик қилиш ва ўзаро тушуниш меморандумини амалга ошириш бўйича «Йўл харитаси» лойиҳаси муҳокама қилинди.
Жорий йилнинг декабрь ойида Тошкент шаҳрида экспертларнинг кейинги ишчи учрашувини ўтказиш ҳамда мактаб ўқувчилари ва ОТМ талабалари ўртасида «Росатом» давлат корпорацияси олимпиадасини ташкил этиш ва ўтказиш тўғрисида келишувга эришилди.
Дарҳақиқат, мазкур меморандум Россия Федерацияси ва Ўзбекистон Республикаси ҳукуматлари ўртасида 2017 йил 29 декабрдаги тинчлик мақсадида атом энергиясидан фойдаланиш соҳасида ҳамкорлик қилиш ва 2018 йил 7 сентябрдаги Ўзбекистон Республикаси ҳудудида электр станцияни қуришда ҳамкорлик қилиш келишувларига амал қилган ҳолда имзоланган.
Меморандум доирасида томонлар Ўзбекистонда илк атом электр станцияси учун операцион ходимларни ўқитиш ва тайёрлаш ҳамда бутун атом энергетика ва туташ соҳаларда ходимларга таълим бериш ва уларни тайёрлаш соҳасида ҳамкорликни амалга оширишни режалаштирди.
Шунингдек, атом энергетикаси ва туташ соҳалари, шу жумладан ядро фани ва технологиялар эҳтиёжларидан келиб чиқиб, қўшма таълим дастурлари, шу жумладан иккита дипломлар дастурларини ташкил этиш режалаштирилди.
Томонлар Ўзбекистон Республикаси ўқитувчиларини Ўзбекистон университетлари, таълим муассасалари ҳамда бошқа корхона ва ташкилотларда ўқув курсларини ташкил қилишни режалаштирган.
Меморандум атом энергетикаси соҳасида ўқув ва илмий адабиётларни ишлаб чиқиш, қисқа муддатли тажрибани орттириш, ёзги мактаб, семинарларни ташкил этиш, Ўзбекистон Республикасининг талаба ва мактаб ўқувчилари ўртасида физика, кимё, математика бўйича танловларни ўтказиш каби бошқа ҳамкорлик йўналишларини ҳам назарда тутади.
Атом тармоғида мутахассисларни тайёрлаш масалаларини муҳокама қилиш учун анжуман, семинарларни, шу жумладан, халқаро экспертлар иштирокида ўтказиш назарда тутилмоқда.
Шу билан бирга,томонлар Россия университетларида Ўзбекистон мутахассислари учун олий таълим дастурларини амалга оширишда кўмаклашади.
Изоҳ (0)