“Xalq so‘zi” Surxondaryo viloyati Termiz tumani markazida joylashgan “Do‘stlik” madaniyat va istirohat bog‘idagi ayanchli ahvolni tanqid qildi.
“Termiz tumani hokimining 2015-yil 7-maydagi 677-sonli qaroriga binoan ushbu dam olish maskani tuman madaniyat bo‘limi tasarrufiga o‘tkazilgach, ahvol yaxshilanishiga umid qilingandi. Biroq, umidlar yana sarobga aylandi”, — deyiladi xabarda.
Ma’lumotlarga ko‘ra, “Do‘stlik” madaniyat va istirohat bog‘i 2004-yilda ishga tushirilgan bo‘lib, umumiy yer maydoni 4 gektarni tashkil etadi. Bog‘ hududidagi 437 tup daraxtlar sug‘orish tizimidagi muammolar sabab, birin-ketin qurib bormoqda.
Istirohat bog‘idagi 3 ta attraksion 1978-yilda o‘rnatilgan bo‘lib, hozir tamomila yaroqsiz holga kelib qolgan. Yo‘laklar ta’mirtalab, o‘rindiqlar singan, sport maydonchalari, ma’muriy bino, yashil maydonchalar vaqt o‘tgani sayin buzilib, vayrona bo‘lib bormoqda.
O‘zbekiston Respublikasi Prezidentining 2018-yil 19—20-yanvardagi Surxondaryo viloyatiga tashrifi chog‘ida berilgan topshiriqlar va kengaytirilgan tarzda o‘tkazilgan majlis bayonida Termiz tumanidagi “Do‘stlik” madaniyat va istirohat bog‘i moddiy texnik bazasini tubdan yaxshilash va modernizatsiya qilish bo‘yicha ham dastur ishlab chiqilgandi.
Unga ko‘ra, mazkur istirohat bog‘ida aholi, ayniqsa, bolalar va o‘smir yoshlarning madaniy dam olishi uchun qulay shart-sharoitlarni yaratish maqsadida yangi sport maydonchalarini qurish va zarur jihozlar bilan ta’minlash, bir necha zamonaviy attraksion va o‘yin qurilmalarini o‘rnatish, shuningdek, suv havzasi, amfiteatr, musiqali favvora, savdo va umumiy ovqatlanish shoxobchalarini qurib, ishga tushirish belgilangandi.
Afsuski, ishlab chiqilgan dastur o‘z holiga tashlab qo‘yilgan. Amaliy ishdan esa hamon darak yo‘q.
Aslini olganda viloyatdagi eng yirik Uchqizil ko‘li yonida joylashgan ushbu madaniyat va istirohat bog‘i o‘zining qulay joylashuviga ko‘ra, har qanday sarmoyador — investor e’tiborini o‘ziga tortadi.
“Tuman rahbarlari, madaniyat boshqarmasi va yoki madaniyat ishlari vazirligi istirohat bog‘idagi ahvolni yaxshilash uchun sarmoya kerakligini ro‘kach qilishi tabiiy. Mahalliy yoki xorijiy sarmoyadorni bu yerga olib kelish uchun ham xohish, istak, ishtiyoq va harakat kerak. Shunday emasmi?!” — deyiladi maqola so‘ngida.
Izoh (0)