O‘zbekistonda 2021-yilning 1-yanvariga qadar zamonaviy issiqxona komplekslarini ishlab chiqaruvchilarga soliq imtiyozlari beriladi. Bu Prezident Shavkat Mirziyoyev imzolagan “Issiqxona komplekslarini rivojlantirish uchun qo‘shimcha shart-sharoitlar yaratish chora-tadbirlari to‘g‘risida”gi qarorda ko‘zda tutilgan.
Qarorga muvofiq, ishlab chiqaruvchilar foyda solig‘i, yagona soliq to‘lovi va qo‘shilgan qiymat solig‘idan ozod etiladi. Bundan iqtisod qilingan mablag‘lar ishlab chiqarishni texnik va texnologik qayta jihozlash, modernizatsiya qilish va rivojlantirish uchun yo‘naltiriladi.
Zamonaviy issiqxona komplekslari va gofrlangan karton idish ishlab chiqarish uchun talab etiladigan, O‘zbekistonda ishlab chiqarilmaydigan uskuna, xomashyo va materiallar, ehtiyot qismlar va butlovchi buyumlar bojxona to‘lovlaridan ham ozod etiladi.
Hujjatda davlat-xususiy sheriklik shartlari asosida qishloq xo‘jaligi ekinlari urug‘larini yetishtirish bo‘yicha Buxoro, Qashqadaryo, Namangan, Samarqand, Surxondaryo va Farg‘ona viloyatlarida urug‘chilik klasterlarini tashkil etilishi belgilandi.
Innovatsiyalarni rivojlantirish vazirligiga issiqxona xo‘jaliklari uchun jahon bozori talablariga mos keladigan, mazali sabzavot ekinlarining hosildorligi yuqori yangi navlari va duragaylarini yaratish topshirildi.
2019/2020-o‘quv yilidan boshlab “Issiqxona xo‘jaliklarini tashkil etish va yuritish”, “Agrokimyo va agrotuproqshunoslik”, “O‘simliklarni himoya qilish”ixtisosliklari yo‘nalishlari bo‘yicha oliy ta’lim muassasalariga bakalavrlar tayyorlash yuzasidan qabul kvotalarini kamida 2 barobar oshirish belgilanmoqda.
Izoh (0)