«Халқ сўзи» Сурхондарё вилояти Термиз тумани марказида жойлашган «Дўстлик» маданият ва истироҳат боғидаги аянчли аҳволни танқид қилди.
«Термиз тумани ҳокимининг 2015 йил 7 майдаги 677-сонли қарорига биноан ушбу дам олиш маскани туман маданият бўлими тасарруфига ўтказилгач, аҳвол яхшиланишига умид қилинганди. Бироқ, умидлар яна саробга айланди», — дейилади хабарда.
Маълумотларга кўра, «Дўстлик» маданият ва истироҳат боғи 2004 йилда ишга туширилган бўлиб, умумий ер майдони 4 гектарни ташкил этади. Боғ ҳудудидаги 437 туп дарахтлар суғориш тизимидаги муаммолар сабаб, бирин-кетин қуриб бормоқда.
Истироҳат боғидаги 3 та аттракцион 1978 йилда ўрнатилган бўлиб, ҳозир тамомила яроқсиз ҳолга келиб қолган. Йўлаклар таъмирталаб, ўриндиқлар синган, спорт майдончалари, маъмурий бино, яшил майдончалар вақт ўтгани сайин бузилиб, вайрона бўлиб бормоқда.
Ўзбекистон Республикаси Президентининг 2018 йил 19—20 январдаги Сурхондарё вилоятига ташрифи чоғида берилган топшириқлар ва кенгайтирилган тарзда ўтказилган мажлис баёнида Термиз туманидаги «Дўстлик» маданият ва истироҳат боғи моддий техник базасини тубдан яхшилаш ва модернизация қилиш бўйича ҳам дастур ишлаб чиқилганди.
Унга кўра, мазкур истироҳат боғида аҳоли, айниқса, болалар ва ўсмир ёшларнинг маданий дам олиши учун қулай шарт-шароитларни яратиш мақсадида янги спорт майдончаларини қуриш ва зарур жиҳозлар билан таъминлаш, бир неча замонавий аттракцион ва ўйин қурилмаларини ўрнатиш, шунингдек, сув ҳавзаси, амфитеатр, мусиқали фаввора, савдо ва умумий овқатланиш шохобчаларини қуриб, ишга тушириш белгиланганди.
Афсуски, ишлаб чиқилган дастур ўз ҳолига ташлаб қўйилган. Амалий ишдан эса ҳамон дарак йўқ.
Аслини олганда вилоятдаги энг йирик Учқизил кўли ёнида жойлашган ушбу маданият ва истироҳат боғи ўзининг қулай жойлашувига кўра, ҳар қандай сармоядор — инвестор эътиборини ўзига тортади.
«Туман раҳбарлари, маданият бошқармаси ва ёки маданият ишлари вазирлиги истироҳат боғидаги аҳволни яхшилаш учун сармоя кераклигини рўкач қилиши табиий. Маҳаллий ёки хорижий сармоядорни бу ерга олиб келиш учун ҳам хоҳиш, истак, иштиёқ ва ҳаракат керак. Шундай эмасми?!» — дейилади мақола сўнгида.
Изоҳ (0)