Janubi-g‘arbiy maxsus harbiy okrugiga qarashli harbiy qismlardan birida jangovar tayyorgarlik mashg‘ulotlarini o‘tkazishda yangicha usullar qo‘llanildi. Bu haqda Mudofaa vazirligi matbuot xizmati “Daryo”ga ma’lum qildi.
Real jangovar sharoitga yaqinlashtirilgan mashqlar davomida shartli dushman tomonidan amalga oshirilishi mumkin bo‘lgan ehtimoliy harakatlar inobatga olinib, ularga qarshi hujumlar uyushtirildi.
“Shaxsiy tarkibining mashg‘ulotlari qurolli to‘qnashuvlarning o‘zgarib borayotgan yo‘nalishlarini hisobga olgan holda tashkillashtirilmoqda. Chuqur izlanishlar natijasida mutaxassisliklar tarkibi, harbiy fanlarni o‘qitishning metod va texnologiyalari hamda o‘quv dasturlari doimiy tarzda yangilanyapti”, — deydi mutaxassis ofitser Shavkat Normirzayev.
Harbiy xizmatchilar taktik o‘quvlarda shaxsiy tarkibning yashovchanligini oshirish, topshiriqlarni minimal yo‘qotishlar bilan bajarish, qurol-yarog‘ va harbiy texnikani mohirona qo‘llash usullarini takomillashtirish bo‘yicha o‘quv topshiriqlarni bajardi.
Ta’kidlanishicha, bu kabi mashg‘ulotlar O‘zbekistonning o‘tish qiyin bo‘lgan tog‘li va cho‘l hududlarida jangovar vazifalarni bajarish, belgilangan hududlarni tezkorlik bilan bosib o‘tish va qisqa vaqt ichida jangovar qobiliyatni tiklash borasida muntazam tashkil etilmoqda.
Izoh (0)