O‘zbekiston tashqi ishlar vaziri Abdulaziz Komilov 6-noyabr kuni Kiprning O‘zbekistonga tayinlangan yangi elchisi (qarorgohi Moskva shahrida) Leonidas Markidisni qabul qildi.
TIV matbuot xizmatining qayd etishicha, vazir Kipr elchisining ishonch yorliqlarini qabul qilar ekan, uni O‘zbekistondagi diplomatik missiyasi boshlanishi bilan tabrikladi va kelgusi faoliyatida muvaffaqiyat tiladi.
Suhbat davomida O‘zbekiston—Kipr aloqalari holati va rivojlantirish istiqbollari muhokama qilindi, hamkorlikni istiqbolli yo‘nalishlarda, jumladan O‘zbekiston—Yevropa Ittifoqi shaklida va xalqaro tashkilotlar doirasida mustahkamlash va yanada rivojlantirishga alohida e’tibor qaratildi.
Muzokaralarda o‘zaro munosabatlarning shartnomaviy-huquqiy bazasini kengaytirish bo‘yicha olib borilayotgan ishlar jarayoni ko‘rib chiqildi, savdo-iqtisodiy, investitsion, transport-kommunikatsiya, madaniyat, ta’lim, fan va sport sohalaridagi hamkorlik to‘g‘risidagi ikki tomonlama bitimlarni tayyorlash va imzolashga qiziqish bildirildi.
“Uchrashuvda xalqaro va mintaqa siyosatiga oid ba’zi masalalar yuzasidan ham fikr almashildi”, — deyiladi TIV axborotida.
Izoh (0)