Ўзбекистон ташқи ишлар вазири Абдулазиз Комилов 6 ноябрь куни Кипрнинг Ўзбекистонга тайинланган янги элчиси (қароргоҳи Москва шаҳрида) Леонидас Маркидисни қабул қилди.
ТИВ матбуот хизматининг қайд этишича, вазир Кипр элчисининг ишонч ёрлиқларини қабул қилар экан, уни Ўзбекистондаги дипломатик миссияси бошланиши билан табриклади ва келгуси фаолиятида муваффақият тилади.
Суҳбат давомида Ўзбекистон—Кипр алоқалари ҳолати ва ривожлантириш истиқболлари муҳокама қилинди, ҳамкорликни истиқболли йўналишларда, жумладан Ўзбекистон—Европа Иттифоқи шаклида ва халқаро ташкилотлар доирасида мустаҳкамлаш ва янада ривожлантиришга алоҳида эътибор қаратилди.
Музокараларда ўзаро муносабатларнинг шартномавий-ҳуқуқий базасини кенгайтириш бўйича олиб борилаётган ишлар жараёни кўриб чиқилди, савдо-иқтисодий, инвестицион, транспорт-коммуникация, маданият, таълим, фан ва спорт соҳаларидаги ҳамкорлик тўғрисидаги икки томонлама битимларни тайёрлаш ва имзолашга қизиқиш билдирилди.
«Учрашувда халқаро ва минтақа сиёсатига оид баъзи масалалар юзасидан ҳам фикр алмашилди», — дейилади ТИВ ахборотида.
Изоҳ (0)