Parijda avtobus haydovchisi nogironligi bo‘lgan shaxsga joy berishdan bosh tortgan yo‘lovchilarning barchasini transportdan tushirib yuborib, nogironlik aravachasida o‘tirgan erkakka joy berdi, deb yozadi “Gazeta.uz”.
Sklerozdan aziyat chekuvchi va nogironlik aravachasida harakatlanuvchi Fransua le Berr bekatlardan birida avtobusga o‘tirmoqchi bo‘ldi, lekin yo‘lovchilardan hech biri unga joy berishni istamadi.
Ismi oshkor qilinmagan haydovchi ushbu holatni ko‘rib, yo‘lovchilardan avtobusni tark etishni so‘ragan. So‘ngra u Fransua le Berrga joy berib, eshiklarni yopgan va yagona yo‘lovchi bilan harakatni davom ettirgan.
Parijdagi avtobuslarda nogironlik aravachasi uchun bir yoki ikkita joy ajratilgan bo‘lib, yo‘lovchilar nogironligi bo‘lgan shaxs chiqqanida unga joy berishi kerakligi belgilangan.
Parijdagi RATP avtobuslar operatori ijtimoiy tarmoqlar orqali ushbu haydovchini topishga yordam berishni so‘rab murojaat qilganida, foydalanuvchilar kompaniya uni jazolashi mumkinligidan xavotirga tushdi. Biroq, RATP vakili gap jazo haqida ketmayotganligini, haydovchi o‘z yo‘lovchisi manfaati uchun namunali ish qilganini ma’lum qildi.
Izoh (0)