Namangan viloyatining Yangiqo‘rg‘on tumanida mahalliy davlat xizmatlari markaziga fuqarolardan o‘zboshimchalik bilan qurilgan uy-joylarga nisbatan egalik huquqini tiklab berish so‘ralgan ko‘plab arizalar kelib tushmoqda. Bu haqda “Daryo”ga tuman hokimligi axborot xizmati ma’lum qildi.
Shu kungacha komissiya a’zolari bo‘lgan tegishli tashkilotlar tomonidan xulosalar yig‘ilib, 70 nafar fuqaroning turar joylariga egalik huquqini belgilash to‘g‘risida tuman hokimi qarori qabul qilindi. Ulardan 60 nafariga kadastr hujjatlari rasmiylashtirilib, bino va yer uchastkalari davlat ro‘yxatidan o‘tkazildi.
Tuman adliya bo‘limi hamda Yer tuzish va ko‘chmas mulk kadastri korxonasi tuman filiali tomonidan ularga bu haqdagi tegishli guvohnomalar taqdim qilindi.
— Yerimizda 5 ta imorat tiklagan bo‘lsak ham, uy hujjatlari bo‘lmagani uchun 2013-yildan beri qonuniylashtira olmay kelayotgandik. Davlat rahbari bizga o‘xshagan holatdagi fuqarolarni o‘ylab qabul qilgan farmoni tufayli mulk huquqimiz tiklandi. Tuman hokimining qarori ham chiqdi, kadastr hujjatlari ham tayyorlandi. Endi ko‘nglimiz xotirjam bo‘lib, ichimizga yorug‘lik kirgandek bo‘ldi, — deydi tumanning “G‘ovazon” mahallasida istiqomat qiluvchi Qudrat Karimov.
Izoh (0)