Moskva viloyatida Toyota Land Cruiser o‘zbekistonliklar bo‘lgan mikroavtobusga urildi. 4 kishi halok bo‘ldi

Moskva viloyatida o‘zbekistonlik mehnat muhojirlari bilan bog‘liq YTH oqibatida 4 kishi halok bo‘ldi, yana shuncha kishi jarohatlandi. Bu haqda “Podrobno.uz” xabar bermoqda.

Avariya 17-oktabr kuni Podolsk shahrida ro‘y berdi. O‘zbekistonlik 7 kishi ketayotgan Mitsubishi Grandis mikroavtobusi balloni bo‘shab, chekkada to‘xtab turganda unga Toyota Land Cruiser mashinasi kelib urildi.

To‘qnashuv oqibatida 3 ayol va bir erkak halok bo‘ldi, yana 4 kishi jarohatlandi. Toyota haydovchisi va ikki yo‘lovchisi ham kasalxonaga yotqizildi. Mikroavtobus haydovchisi avtomobildan chiqqani va avariya belgisini qo‘ygani uchun jabrlanmadi.

Huquq-tartibot idoralariga ko‘ra, mikroavtobusda 27 dan 48 yoshgacha odamlar bo‘lgan. Hodisa  yuzasidan jinoiy ish qo‘zg‘atildi.