Ektor Kuper boshliq O‘zbekiston milliy terma jamoasi FIFA kunlari doirasida 16-oktabr kuni Toshkentda Qatar termasiga qarshi o‘rtoqlik o‘yinida maydonga tushadi. O‘yin oldidan bugun Ektor Kuper va terma jamoa a’zosi Odil Hamrobekov matbuot anjumanida ishtirok etdi.
— Ertaga bu yig‘indagi ikkinchi o‘yinda maydonga tushamiz. Bu uchrashuvda birinchi o‘yindagi yaxshi jihatlarni saqlab qolish va uni davom ettirishga harakat qilamiz. Undan tashqari birinchi o‘yinda kamroq o‘ynagan futbolchilar Qatar bilan ko‘proq harakat qilishadi. Bu degani tarkib butunlay o‘zgarib ketadi degani emas. Bu o‘yindan keyin futbolchilar o‘z klublariga ketishadi. Bir oydan keyingi yig‘inda ham bu o‘yinchilar terma jamoadagi uslubni yoddan chiqarmagan holda kelishlarini istardim.
— KXDR bilan o‘yinda qatarlik videotasvirchi stadionga kelib o‘yinni videoga oldi. Ular o‘z guruhdoshi KXDRni o‘rganishni boshlashgan. Bizning guruhda Yaponiya, Ummon va Turkmaniston bor. O‘z raqiblarimizni o‘rganish jarayoni boshlandimi?
— Albatta, raqiblarimizni o‘rganamiz. Bugungi kunda axborot texnologiyalari rivojlanib ketgan. Shu bois stadionga bormay turib ham videoni ko‘rish mumkin. Keyingi o‘yinlarda o‘z vakillarimizni raqib jamoa o‘yinlariga yuboramiz. Bundan tashqari hozirgi paytda birinchi navbatda o‘z o‘yinimizga qaratyapmiz. Raqiblarimiz haqida barcha ma’lumotlar bor.
— Livan terma jamoasi bosh murabbiyi Miodrag Radulovich noyabr oyida Avstraliyada O‘zbekiston bilan o‘ynaymiz deb intervyu berdi. Rostdan ham bu o‘yin bo‘ladimi yoki yo‘qmi?
— Bizga 15-noyabr kuni Livan bilan o‘ynaymiz degan ma’lumot berilgan. Agar qandaydir o‘zgarish bo‘lgan bo‘lsa bundan xabarimiz yo‘q.
— Sardor Rashidov bu yig‘inga chaqirilmagani sababi jarohatmi yoki Eron bilan o‘yindagi himoyaviy ko‘rsatmalarni bajarmaganidami?
— Men O‘zbekiston terma jamoa bilan shartnoma tuzayotganda hech kim mana shu futbolchilar doim termaga chaqirilishi kerak deb aytmagan. Bu yig‘inga chaqirilmagani bilan bo‘ldi terma jamoaga chaqirilmaydi degani emas. Hech qaysi futbolchiga terma jamoadan joy kafolatlanmagan.
— Siz asosan 4-2-3-1 taktikasidan foydalanayapsiz. Osiyo Kubogiga qadar zaxira taktikalarini ham qo‘llab ko‘rasizmi?
— Hozir futbolchilarga ko‘plab taktikalar berib tashlasam ular nima qilishni bilmay qolishadi. Eron bilan o‘yinda nimaga yutqazdik? Ko‘rsatmalarni oxirigacha to‘g‘ri bajarishmagani uchun yutqazdik. Mening taktikam barchaga yoqmasligi aniq. Men 100 million aholisi bor mamlakat terma jamoasini boshqarganman. Endi 100 million odamga yoqadigan taktika bormi aytingchi? Agar barchasi yaxshi bo‘lsa, ya’ni Osiyo Kubogini qo‘lga kiritsak yoki Jahon chempionatiga chiqsak taktika ish berayotgan bo‘ladi. Agar bunday bo‘lmasa taktikani o‘zgartirish kerak bo‘ladi.
— O‘FA rasmiy Vitaliy Denisov oktyabr oyidagi yig‘inga jarohati bois chaqirilmadi deb yozdi. Lekin o‘z klubida o‘ynadi. U rostdan ham jarohati bois chaqirilmadimi yoki boshqa sabab bormi?
— Menga Denisovda jarohat bor deb aytishdi. Klubida o‘ynagan bo‘lsa hech nima qila olmaymiz. U aynan jarohati bois oktabr oyidagi yig‘inga chaqiruv olmadi.
Ektor Kuper, O‘zbekiston milliy terma jamoasi bosh murabbiyi
— Ertaga bizni qiziqarli o‘yin kutib turibdi. Qatar bilan o‘yinlar doim qiziqarli o‘tgan. Arab davlati jamoalari doim hujumkor o‘yin namoyish etishgan.
— KXDR bilan o‘yindan so‘ng ko‘plab jamoadoshlaringiz maydondan nolishdi. Siz ham ushbu maydonda o‘ynagan futbolchi sifatida nima deya olasiz?
— Maydon holatini juda yomon deb ham bo‘lmaydi. Chetdan kelayotgan jamoalar uchun ham, biz uchun bu yerda o‘ynash noqulay bo‘lmoqda. Maydon ideal futbol namoyish etish uchun imkon bermayapti. Barcha ko‘rib turibdi chim ko‘chiib ketmoqda. Bu narsa natijaga bahona bo‘la olmaydi, shunchaki barcha ko‘rib turgan holatni aytayapman.
Odil Hamrobekov, O‘zbekiston milliy terma jamoasi yarim himoyachisi
Izoh (0)