Toshkent shahrida yashovchi diniy ekstremistik oqimlarga aloqadorligi sabab (159-modda) ozodlikdan mahrum etilgan fuqarolardan biri 18 yillik jazo muddatini o‘tab uyiga qaytdi. Shahar hokimligi vakillari u bilan suhbat o‘tkazib, uning muammolarini o‘rgandi, deya xabar beradi O‘zA.
Ma’lum bo‘lishicha, fuqaro A.T. ning uzoq yillik qamoq jazosini o‘tash davrida sog‘lig‘i og‘irlashgan. Shuningdek, bir ishni boshini tutib, o‘sib unadigan davrini panjara ortida o‘tkazgani sababli u ishsiz, hunarsiz qolmoqda edi.
Prezident ana shunday ekstremistik oqimlarga aloqadorligi sabab qamalib chiqqan fuqarolarni jamiyatga qaytarish va ularga yordam qo‘lini cho‘zish kerakligini ko‘p bora ta’kidlagan, ana shunday fuqarolarga moddiy yordam qilgan yurtdoshlar birinchilardan bo‘lib haj safariga borishga loyiq ekanligini e’tirof etgan. Bugun ayni shu maqsad bilan bir qancha hajga borishni uzoq yillardan buyon orzu qilib, navbat kutib turgan otaxon-onaxonlar ularga yordam qilmoqda.
Ipakchilik mahallasida yashovchi N. Muhamedov rafiqasi bilan 7 yildan buyon Haj safariga borish uchun navbat kutib kelmoqda edi. Toshkent shahar hokimligi tavsiyasi bilan u ozodlikka chiqqan fuqaroga sog‘lig‘ini reabilitatsiya qilish uchun kasalxonaga yotib davolanishi va haydovchilik o‘quv kursida o‘qishiga homiylik qildi. N. Muhamedov yana fuqaro A.T.ga ko‘zida jarrohlik operatsiyasini o‘tkazishda yordam ko‘rsatishni ham rejalashtirgan. Ipakchilik mahallasida istiqomat qiluvchi N. Muhamedov ushbu amallarni nafaqat haj orzusi, balki savob yo‘lida qilganini aytmoqda.
Izoh (0)