Тошкент шаҳрида яшовчи диний экстремистик оқимларга алоқадорлиги сабаб (159-модда) озодликдан маҳрум этилган фуқаролардан бири 18 йиллик жазо муддатини ўтаб уйига қайтди. Шаҳар ҳокимлиги вакиллари у билан суҳбат ўтказиб, унинг муаммоларини ўрганди, дея хабар беради ЎзА.
Маълум бўлишича, фуқаро А.Т. нинг узоқ йиллик қамоқ жазосини ўташ даврида соғлиғи оғирлашган. Шунингдек, бир ишни бошини тутиб, ўсиб унадиган даврини панжара ортида ўтказгани сабабли у ишсиз, ҳунарсиз қолмоқда эди.
Президент ана шундай экстремистик оқимларга алоқадорлиги сабаб қамалиб чиққан фуқароларни жамиятга қайтариш ва уларга ёрдам қўлини чўзиш кераклигини кўп бора таъкидлаган, ана шундай фуқароларга моддий ёрдам қилган юртдошлар биринчилардан бўлиб ҳаж сафарига боришга лойиқ эканлигини эътироф этган. Бугун айни шу мақсад билан бир қанча ҳажга боришни узоқ йиллардан буён орзу қилиб, навбат кутиб турган отахон-онахонлар уларга ёрдам қилмоқда.
Ипакчилик маҳалласида яшовчи Н. Муҳамедов рафиқаси билан 7 йилдан буён Ҳаж сафарига бориш учун навбат кутиб келмоқда эди. Тошкент шаҳар ҳокимлиги тавсияси билан у озодликка чиққан фуқарога соғлиғини реабилитация қилиш учун касалхонага ётиб даволаниши ва ҳайдовчилик ўқув курсида ўқишига ҳомийлик қилди. Н. Муҳамедов яна фуқаро А.Т.га кўзида жарроҳлик операциясини ўтказишда ёрдам кўрсатишни ҳам режалаштирган. Ипакчилик маҳалласида истиқомат қилувчи Н. Муҳамедов ушбу амалларни нафақат ҳаж орзуси, балки савоб йўлида қилганини айтмоқда.
Изоҳ (0)