Shavkat Mirziyoyev 8-oktyabr kuni Parijda Fransiya Senati raisi Jerar Larshe bilan uchrashdi. Bu haqda Prezident matbuot xizmati xabar bermoqda.
Davlat rahbari Senat raisini Fransiya Konstitutsiyasi qabul qilinganining 60 yilligi bilan tabrikladi. Ushbu sana munosabati bilan mamlakatda o‘zbek va fransuz tillarida chop etilgan Fransiya Konstitutsiyasining ilk nusxasini sovg‘a qildi. Jerar Larshe bu kitobni katta mamnuniyat bilan qabul qildi.
Shavkat Mirziyoyev mamlakatlar parlamentlari o‘rtasidagi hamkorlik ulardagi do‘stlik guruhlari ishi tufayli ancha faollashganini mamnuniyat bilan qayd etdi.
Bugungi kunda O‘zbekiston Oliy Majlisining ikkala palatasida ham Fransiya parlamenti bilan hamkorlik guruhlari tashkil etilgan. Fransiya Senatida “Fransiya — Markaziy Osiyo” parlamentlararo guruhi, quyi palata — Milliy assambleyada “Fransiya — O‘zbekiston” do‘stlik guruhi faoliyat yuritmoqda.
Fransiya Senati raisi O‘zbekistonda iqtisodiyotni modernizatsiya qilish, aholi farovonligini oshirish va kuchli fuqarolik jamiyatini barpo etish borasida amalga oshirilayotgan keng miqyosli islohot va yangilanishlarni yuksak baholadi.
O‘zbekiston yaxshi qo‘shnichilik, hamkorlik va manfaatlarni o‘zaro hisobga olish tamoyillariga asoslangan konstruktiv mintaqaviy siyosat olib borayotganini alohida ta’kidladi.
Jerar Larshe Fransiya O‘zbekiston bilan do‘stlik rishtalari, samarali sheriklik munosabatlarini mustahkamlash yo‘lida parlamentlararo aloqalarni yanada rivojlantirish va ularga tizimli tus berishga tayyor ekanini ta’kidladi.
Shavkat Mirziyoyev rahbari Fransiya Senatining tarixiy binosini ko‘zdan kechirdi.
Izoh (0)