Қирғизистон Республикаси Иссиқкўл вилоятининг Чўлпонота шаҳрида Марказий Осиё давлатлари (Қирғизистон, Қозоғистон, Тожикистон, Ўзбекистон) ички ишлар вазирларининг биринчи кенгайтирилган қўшма йиғилиши ўз якунига етди, деб хабар берди ИИВ Жамоатчилик ва оммавий ахборот воситалари билан алоқалар бошқармаси.
Мазкур форматдаги тадбир биринчи бор ўтказилиши. Халқаро аҳамият касб этувчи ушбу тадбир Қирғизистон Республикаси Президенти Сооранбай Жеенбеков томонидан Марказий Осиё давлатлари раҳбарларининг Остона шаҳридаги биринчи маслаҳат учрашуви давомида Марказий Осиё давлатлари халқларининг манфаатлари йўлида минтақавий ҳамкорликка йўналтирилган, биродарлик ва қўшничилик алоқаларини янгилаш ва фаоллаштириш борасидаги қўйилган топшириқлари ижросини таъминлаш мақсадида ўтказилмоқда.
Учрашувда Тожикистон Республикаси ИИВ делегацияси раҳбари сифатида ички ишлар вазири милиция генерал-полковниги Рахимзода Рамазон Хамро, Қозоғистон Республикаси ИИВ делегацияси раҳбари ички ишлар вазири полиция генерал-полковниги Касимов Калмуханбет Нурмуханбетович, Ўзбекистон Республикаси ИИВ делегацияси раҳбари ички ишлар вазири генерал-майор Бобожонов Пўлат Раззоқовичлар иштирок этишди.
Шунингдек, йиғилишда Марказий Осиё давлатлари ИИВларининг чегарадош вилоятлар ИИББлари, ИИБлари ва департаментлари раҳбарлари ҳам иштирок этди: (Чуй вилояти ИИББ, Иссиқкўл, Талас, Ош, Жалолобод, Боткен вилоят ИИБлари, Қозоғистон Республикаси Олмаота ва Жамбул вилоятлари ички ишлар департаменти, Тожикистон Республикаси Сўғд вилояти ИИБ, Ўзбекистон Республикаси Андижон, Наманган, Фарғона вилоят ИИБлари раҳбарлари).
Йиғилишда Қирғизистон Республикаси ички ишлар вазири Кашкар Джунушалиев сўзга чиқиб, «Аввало, Сизга Қирғизистон, Қозоғистон, Тожикистон, Ўзбекистон Республикалари ички ишлар вазирлари қўшма йиғилишини ўтказиш юзасидан қилинган ташаббусни қўллаб қувватлаганингиз учун миннатдорчилигимни билдираман. Марказий Осиё чегарадош давлатлари форматидаги ушбу учрашув вазирликларимизнинг минтақада янада чуқурроқ ҳамкорлик қилишга интилишидан даракдир», деб таъкидлади.
Кашкар Джунушалиев яна, давлатлар манфатлари чамбар-чарс боғлиқлигини, долзарб масалаларни ечишда ўзаро ҳамкорлик асосига ёндашиш лозимлигини, ушбу форматдаги учрашувлар бизга минтақа давлатларини бир хил ташвишга солаётган жиноятчилик оламидаги янги таҳдидларни ўз вақтида аниқлаш имкониятини беришини ҳам айтиб ўтди.
Компьютер технологиялари ва жаҳон интернет тармоғининг ривожи даврида алоқаларда «Кибер-экстремизм» ва«Кибер-терроризм» хавфлари тус олмоқда.
Асосан у интернет тармоқларида тарғибот-ташвиқот кўринишларида намоён бўлиб, ўйлаб топилган оғир психологик ҳолатлар натижасида маблағларидан воз кечиш, ҳамкорларини ёллаш, терактлар уюштириш, психологик таҳдидлар, қўрқитиш, диний ва бошқа кўринишларда бўлади. Информацион жамият эса, ушбу таҳдидлардан ҳимояланишга муҳтождир.
Куннинг биринчи ярмида барча йиғилиш қатнашчилари 4 ишчи гуруҳига бўлиниб, уюшган жиноятчиликка, экстремизм ва терроризмнинг кўринишларига қарши курашиш механизмларини, шунингдек, интернет тармоғи жиноятчилиги, чегарадош ҳудудлар ички ишлар органларининг жамоат тартибини ва хавфсизлигини таъминлаш борасидаги саволларини муҳокама қилди.
Учрашув якунида Марказий Осиё мамлакатлари ИИВларининг қўшма баёни имзоланди.
Бундан ташқари, учрашув жараёнида Ўзбекистон ва Қирғизистон Республикалари ички ишлар вазирлари томонидан уюшган жиноятчиликка қарши курашиш, экстремизм ва терроризмнинг кўринишларига қарши курашишда ўзаро тажриба алмашиш, чегарадош жойларда жамоат тартибини сақлаш ва жамоат хавфсизлигини таъминлаш борасида қўшма режа имзоланди.
Ички ишлар вазирликлари раҳбарлари иштирокидаги мазкур учрашув дўстона, ишчан ва ишончли руҳда ўтди.
Изоҳ (0)