Abdumajid Hasanov asli buxorolik. Fransiyaga 1998-yilda o‘qishga kelgan, deya hikoya qiladi O‘zA.
U 1994—1998-yillarda Jahon iqtisodiyoti va diplomatiya universitetida tahsil olgan. Fransiyada iqtisod yo‘nalishida o‘qib, Parijdagi Exane Bnp Paribas fond birjasining moliya va nazorat bo‘limida 8 yil faoliyat ko‘rsatgan. Shundan so‘ng ipoteka kreditlari bilan shug‘ullanuvchi Credit Immobiliyer de France banki moliya bo‘limining biznes-reja nazorati boshlig‘i bo‘lib ishlagan.
— Ayni paytda shaxsiy korxonamga egaman, — deydi A.Hasanov. — Korxonamiz biznes-reja tuzish, obyektlarning narxlarini baholash bilan shug‘ullanadi. Bugun bu sohaga talab juda katta. Avgust oyida Toshkentga bordim. Iqtisodiyot vazirligi, “O‘zbekneftgaz” aksiyadorlik jamiyatida bo‘lib, mutasaddi rahbarlar bilan uchrashdim. Uchrashuvda Harakatlar strategiyasi ijrosi bo‘yicha o‘z takliflarimni taqdim qildim. O‘ylaymanki, Prezident Shavkat Mirziyoyev tomonidan boshlangan islohotlar yaqin yillarda o‘z samarasini beradi.
Abdumajid Hasanovning ta’kidlashicha, Fransiyadagi o‘zbeklar har yakshanba yig‘ilib turadi. Ular sport musobaqalarini tashkil etib, oilaviy bordi-keldi qiladi.
Izoh (0)