Parijda Prezident Shavkat Mirziyoyevning Fransiyaga davlat tashrifi arafasida o‘tkazilgan O‘zbekiston—Fransiya biznes-forumi doirasida Milliy bank Fransiyaning Credit Agricole banki bilan 300 million yevrolik shartnoma imzoladi.
Shartnoma eksport kredit agentliklari sug‘urta qoplamasi ostida fransuz bankining kredit liniyasi hisobidan O‘zbekistondagi investitsiya loyihalarini moliyalashtirishni nazarda tutadi. Credit Agricole Fransiya va boshqa Yevropa mamlakatlaridan uskunalar va texnologiyalarni yetkazib berish bo‘yicha savdoni moliyalashtirish bo‘yicha xizmatlarni taklif qilishga tayyor.
Milliy bank tomonidan imzolangan kredit shartnomasi yangi sarmoya bozorlaridan foydalanish imkoniyatini ochib beradi, bu uzoq muddatli kredit resurslarini yanada qulayroq sharoitlarda jalb etish imkonini beradi.
Credit Agricole faqat kredit resurslari bilan chegaralanib qolmay, o‘zbek tadbirkorlariga fransuz biznesi bilan aloqalarni yo‘lga qo‘yish bo‘yicha konsalting xizmatlarini taqdim etadi.
Fransuz banki kredit liniyasi davlat kafolatisiz jalb ehtilishi xalqaro moliya institutlarining O‘zbekiston va uning bank muassasalariga ishonchi ortib borayotganidan dalolat beradi.
Ma’lumot uchun, Credit Agricole Fransiya va Yevropa bank xizmatlari bozorida yetakchi bo‘lib, dunyoning 50 mamlakatida 52 milliondan ortiq mijozga xizmat ko‘rsatadi. Guruh aktivlari 1,82 trillion yevro baholanadi va dunyoning eng yirik 50 banki orasida 13-o‘rinni egallaydi.
Eslatib o‘tamiz, oldinroq Milliy bank Fransiyaning NATIXIS banki bilan 500 million yevroga teng kredit bitimlarini imzolagani bildirilgandi.
Izoh (0)