“O‘zbekoziqovqatzaxira” uyushmasidan olingan ma’lumotlarga ko‘ra, bu yilgi mavsumda muhim oziq-ovqat mahsulotlari taqchilligi, ular narxining asossiz oshib ketishiga yo‘l qo‘ymaslik maqsadida puxta tayyorgarlik ko‘rilmoqda. Bu haqda “Xalq so‘zi” xabar bermoqda.
Xususan, 2018—2019-yil qish-bahor mavsumida aholini muhim iste’mol tovarlari bilan kafolatli ta’minlash uchun 140 ming tonna qishloq xo‘jaligi mahsuloti, jumladan, 50 ming tonna kartoshka, 20 ming tonna piyoz, 40 ming tonna sabzi va 30 ming tonna guruch zaxirasini yaratish belgilangan.
Buning uchun Buning uchun uyushma tizimidagi korxonalarning sig‘imi 99 ming 800 tonnalik quruq, 63,5 ming tonnalik sovitkichli omborlari xatlovdan o‘tkazildi. O‘tgan qisqa davrda ushbu obyektlarning holatidan kelib chiqqan holda ta’mirlash ishlari bajarilib, mahsulot saqlash uchun tayyor holga keltirildi.
Shu bilan birga, joriy yilda tizimdagi 16 ta korxona tomonidan qiymati 18,5 milliard so‘mlik 10,5 ming tonnalik sovitkichli sig‘imlar foydalanishga topshirilishi rejalashtirilgan. Boshqacha aytganda, 8,3 ming tonnalik yangi omborlar qurilib, 2,2 ming tonnalik mavjud omborlarning modernizatsiya qilinishi evaziga infratuzilma obyektlari yanada takomillashtirilmoqda. Bu esa meva-sabzavotlarni to bahorgacha sifatli saqlab, xalqimiz dasturxoniga tortiq qilish imkonini beradi.
Mutaxassislarning aytishicha, o‘tgan yilgi tajribadan kelib chiqib, mahsulot yetishtirishga ham alohida e’tibor qaratilyapti. Ya’ni qishloq xo‘jaligi ekinlaridan mo‘l hosil olish, muhim oziq-ovqat mahsulotlari zaxirasini yaratish maqsadida dehqon va fermer xo‘jaliklari har tomonlama qo‘llab-quvvatlanmoqda. Masalan, kartoshka yetishtirish hajmini oshirish, aholining ehtiyojini barqaror ta’minlashga qaratilgan chora-tadbirlar doirasida tizim korxonalari tomonidan xorijdan qariyb 3 ming tonna urug‘lik kartoshka olib kelindi. Bundan tashqari, takroriy ekinlardan yetishtiriladigan 277,9 ming tonna mahsulotlarni sotib olish bo‘yicha shartnomalar tuzilib, bo‘nak mablag‘lari bahor-yoz oylarida fermer va dehqon xo‘jaliklarining hisob raqamlariga o‘tkazib berildi.
O‘tgan yili qishloq xo‘jaligi mahsulotlarini bevosita yetishtiruvchilardan xarid qilib, yil davomida ularning maqbul narxlarda savdosini yo‘lga qo‘yishga qaratilgan “Xizmat — beminnat” chakana savdo pavilonlari tashkil etilgan edi. Ayni paytda yengil konstruksiyalardan foydalangan holda bunyod etilgan 73 ta shunday pavilon respublikadagi dehqon bozorlari hamda aholi gavjum joylarda faoliyat yuritmoqda. Shaxsiy tomorqa yer egalari, dehqon va fermer xo‘jaliklaridan mahsulotlarni to‘g‘ridan-to‘g‘ri qabul qilish uchun esa respublika bo‘yicha 100 ta maxsus punkt tashkil etildi.
Izoh (0)