Тошкентда Huawei Инновациялар куни ўтказилди. Бу ҳақда «Дарё»га Инновацион ривожланиш вазирлиги матбуот хизмати хабар берди.
Бу йилги тадбир «Тараққиёт стратегияси» маркази билан ҳамкорликда ташкил этилиб, «Марказий Осиёдаги рақамли технологиялар учун инновациялар» мавзусига бағишланди. Турли мамлакатлар ҳукумат ходимлари, саноат ва илмий доира вакилларининг қарийб 200 нафари рақам рақамли инфратузилманинг иқтисодий ўсишга таъсири, инновацион лойиҳалар ишлаб чиқаришни рағбатлантириш ва умумий муваффақият экотизимини яратиш каби мавзуларни муҳокама қилиш учун йиғилдилар.
Инновацион ривожланиш вазири Иброҳим Абдураҳмонов табрик сўзи билан чиқиб, иштирокчиларини қутларкан, сўнгги йилларда Ўзбекистон ва Хитой ўртасида барча йўналишлар, жумладан, илм-фан ва таълим соҳасида икки томонлама ҳамкорлик ривожланаётганлигини таъкидлади.
Вазирлик ва Huawei компанияси ўртасида ОТМ талабалари учун видеоконференция тарзида онлайн-курсларни ташкил этиш, инновацион марказлардан бирини янги замонавий технологиялари билан жиҳозлаш, муайян фермер хўжалиги базасида «Ақлли қишлоқ хўжалиги» технологиясини жорий қилиш ва синовдан ўтказиш юзасидан келишиб олинганини билдирди.
Huawei Инновациялар куни Марказий Осиёдаги рақамли экотизимни барпо этишга жалб қилинган асосий манфаатдор томонлар ўртасида кенг қамровли мулоқотни амалга ошириш учун платформага айланиб улгурди. Тадбир доирасида иштирокчилар рақамли трансформация жараёнида ҳукуматларнинг ўрни ва мавқеи ҳақида фикр алмашди.
Маълумот учун, 2013 йилдан бери Huawei Инновациялар кунлари Лондон, Милан, Мюнхен, Париж, Сингапур, Сидней, Куала-Лумпур, Дубай ва Сан-Паулу шаҳарларида бўлиб ўтди. Huawei Марказий Осиё минтақаси Туркия, Украина, Беларусь, Грузия, Озарбайжон, Ўзбекистон, Қозоғистон, Қирғизстон, Тожикистон, Туркманистон ва Мўғулистонни қамраб олади.
Изоҳ (0)