O‘zbekiston yoshlar ittifoqi, Savdo-sanoat palatasi, Oliy va o‘rta maxsus kasb-hunar ta’limi hamda Bandlik va mehnat munosabatlari vazirliklari hamkorligida Toshkent shahridagi Yoshlar ijod saroyida tashkillangan “Ta’lim va mutaxassislik” XIX xalqaro ko‘rgazmasi o‘z ishini boshladi. Bu haqda “Daryo”ga Yoshlar media markazi ma’lum qildi.
Ko‘rgazma ta’lim va bandlik yo‘nalishlarida tashkil etildi. Unda AQSh, Xitoy, Fransiya, Xindiston, Yaponiya, Germaniya, Latviya, Chexiya, Angliya, Malayziya, Vengriya, Ispaniya, Rossiya, Kanada, Shveysariya va Singapurdagi nufuzli oliy o‘quv yurtlari, ularning O‘zbekistondagi filiallari, O‘zbekistonda faoliyat yuritayotgan oliy ta’lim muassasalari, xorijda ta’lim olishga ko‘maklashuvchi tashkilotlar, nodavlat ta’lim muassasalari hamda o‘quv kurslari ishtirok etmoqda.
Shuningdek, ko‘rgazma doirasida bandlikka ko‘maklashuvchi markazlar, yirik kompaniyalar ishtirokida “Bo‘sh ish o‘rinlari mehnat yarmarkasi” tashkil etilib, unda Koreya xalqaro hamkorlik agentligi (KOISA) hamda Tashqi mehnat migratsiyasi masalalari agentligi ham qatnashdi.
Ko‘rgazmaga ish izlayotgan yoshlar, umumta’lim maktablari, kasb-hunar kollejlari va akademik litsey o‘quvchilari, abituriyentlar, talabalar, ularning ota-onalari, o‘quv muassasalari vakillari va barcha qiziquvchilar keldi. Ulardan biri — Mehriddin Sultonov ko‘rgazma haqidagi taassurotlari bilan bo‘lishdi.
—Ko‘rgazma men uchun juda ahamiyatli bo‘ldi. Chunki 4 yildan beri talaba bo‘lolmayapman. Bu yerdagi 20 ga yaqin ta’lim muassasaci, qolaversa, bir qator tayyorlov kurslari faoliyati haqida to‘liq ma’lumotga ega bo‘ldim. Asosiysi, Toshkentdagi Singapur menejmentni rivojlantirish instituti qoshidagi tayyorlov kursiga a’zo bo‘ldim. Bugungi tadbir men uchun to‘g‘ri tanlov imkoniyatini yaratdi.
“Ta’lim va mutaxassislik” XIX xalqaro ko‘rgazmasi 22-sentabrga qadar davom etadi.
Izoh (0)