Ўзбекистон ёшлар иттифоқи, Савдо-саноат палатаси, Олий ва ўрта махсус касб-ҳунар таълими ҳамда Бандлик ва меҳнат муносабатлари вазирликлари ҳамкорлигида Тошкент шаҳридаги Ёшлар ижод саройида ташкилланган «Таълим ва мутахассислик» XIX халқаро кўргазмаси ўз ишини бошлади. Бу ҳақда «Дарё»га Ёшлар медиа маркази маълум қилди.
Кўргазма таълим ва бандлик йўналишларида ташкил этилди. Унда АҚШ, Хитой, Франция, Хиндистон, Япония, Германия, Латвия, Чехия, Англия, Малайзия, Венгрия, Испания, Россия, Канада, Швейцария ва Сингапурдаги нуфузли олий ўқув юртлари, уларнинг Ўзбекистондаги филиаллари, Ўзбекистонда фаолият юритаётган олий таълим муассасалари, хорижда таълим олишга кўмаклашувчи ташкилотлар, нодавлат таълим муассасалари ҳамда ўқув курслари иштирок этмоқда.
Шунингдек, кўргазма доирасида бандликка кўмаклашувчи марказлар, йирик компаниялар иштирокида «Бўш иш ўринлари меҳнат ярмаркаси» ташкил этилиб, унда Корея халқаро ҳамкорлик агентлиги (КOISА) ҳамда Ташқи меҳнат миграцияси масалалари агентлиги ҳам қатнашди.
Кўргазмага иш излаётган ёшлар, умумтаълим мактаблари, касб-ҳунар коллежлари ва академик лицей ўқувчилари, абитуриентлар, талабалар, уларнинг ота-оналари, ўқув муассасалари вакиллари ва барча қизиқувчилар келди. Улардан бири — Меҳриддин Султонов кўргазма ҳақидаги таассуротлари билан бўлишди.
—Кўргазма мен учун жуда аҳамиятли бўлди. Чунки 4 йилдан бери талаба бўлолмаяпман. Бу ердаги 20 га яқин таълим муассасаcи, қолаверса, бир қатор тайёрлов курслари фаолияти ҳақида тўлиқ маълумотга эга бўлдим. Асосийси, Тошкентдаги Сингапур менежментни ривожлантириш институти қошидаги тайёрлов курсига аъзо бўлдим. Бугунги тадбир мен учун тўғри танлов имкониятини яратди.
«Таълим ва мутахассислик» XIX халқаро кўргазмаси 22 сентябрга қадар давом этади.
Изоҳ (0)