19-sentabr kuni Tojikiston mudofaa vaziri general-olkovnik Sherali Mirzo dala o‘quv maydonida chegara hududlari yaqinidagi aholi yashash punktiga joylashgan shartli terrorchilarni bartaraf etish bo‘yicha o‘tkazilgan Tojikiston—O‘zbekiston hamkorlikdagi mashg‘ulotlarning asosiy qismiga tayyorgarlik jarayonlarini kuzatdi. Bu haqda O‘zbekiston Mudofaa vazirligi matbuot xizmati “Daryo”ga ma’lum qildi.
Sherali Mirzo ilk marotaba o‘tkazilayotgan bu kabi qo‘shma mashg‘ulotlar Markaziy Osiyo mintaqasidagi xavfsizlik va barqarorlikni mustahkamlashga xizmat qilishini ta’kidladi.
Shuningdek, mashg‘ulotlarning real vaziyatga yaqin tarzda o‘tkazilishi, bunda har bir bo‘linma oldida aniq vazifalar belgilangani haqida ham to‘xtalib o‘tildi.
Kunning ikkinchi yarmida O‘zbekiston Qurolli Kuchlari Markaziy ashula va raqs ansambli hamda Mudofaa vazirligi Markaziy harbiy orkestri jamoasi tomonidan Xo‘jand shahri markazidagi “Kamoli Xo‘jandiy” bog‘ida konsert dasturi namoyish etildi. O‘zbek va tojik tillarida mahorat bilan ijro etilgan kuy-qo‘shiqlar ho‘jandliklar qalbidan munosib joy egalladi.
Eslatib o‘tamiz, Tojikistonda o‘tkazilayotgan o‘quv mashg‘ulotlarida O‘zbekiston tomonidan 100 nafardan ortiq harbiy xizmatchilar o‘zlarining texnikalari bilan ishtirok etmoqda.
Izoh (0)