Samarqand viloyati Ichki ishlar boshqarmasi Yo‘l harakat xavfsizligi boshqarmasida haftaning juma kunlari “Yo‘l harakati xavfsizligi kuni” va har oyning uchinchi juma kuni “Avtomobilsiz kun” aksiyasi bo‘yicha matbuot anjumani bo‘lib o‘tdi. Bu haqida “Daryo” muxbiri Farhod Norbo‘tayev xabar bermoqda.
Matbuot anjumanida viloyat IIB YHXB boshlig‘i Abdunabi Nosirovning ma’lum qilishicha joriy yilning o‘tgan 8 oyi davomida viloyat bo‘yicha sodir etilgan jami yo‘l-transport hodisalari 25 taga (539-564), ular oqibatida halok bo‘lganlar soni 17 taga (179-196), tan jarohati olganlar soni 41 taga (456-497) kamayishiga erishilgan.
Jamoatchilik nazoratini kuchaytirish maqsadida viloyat IIB YHXBning “Telegram”, “Facebook” ijtimoiy internet tarmoqlarida alohida saytlariga fuqarolar tomonidan kelib tushgan takliflar o‘rganilib, yo‘l harakati ishtirokchilari tomonidan aniqlanib saytga joylashtirilgan 300 dan ortiq qoidabuzarliklar bo‘yicha qonuniy choralar ko‘rilgan.
Abdunabi Nosirovning ta’kidlashicha, 53,3 ming nafar fuqarolarga yangi namunadagi haydovchilik guvohnomalari tarqatilgan bo‘lib, shundan 1713 tasi Past Darg‘om tumanida sinov tarzida tashkil etilgan davlat xizmatlari markazi orqali berilgan.
Viloyatda yiliga 25 ming avtotransport vositasi ko‘payishi sabab tirbandlik kelib chiqayotgani, ayniqsa, katta yo‘llarga o‘rnatilgan maxsus mulyajlar va tezlikni o‘lchagich moslamalari haydovchi hushyorligini oshirishga xizmat qilayotgani ta’kidlandi.
“Profilaktika kuni” munosabati bilan 2751 marotaba mahallalarda, 2890 marotaba ta’lim muassasalarida, 4799 marotaba korxona-tashkilotlar va boshqa aholi gavjum joylarda keng jamoatchilik bilan uchrashuvlar hamda profilaktik tushuntirish ishlari o‘tkazib kelindi.
Viloyat hududidan o‘tuvchi xalqaro va davlat ahamiyatidagi avtomobil yo‘llariga 69 ta tezlikni o‘lchash uskunalari va 27 ta yo‘l-patrul avtomashinasi mulyaji tayyorlanib, avariya o‘choqlariga o‘rnatildi.
Viloyat hududidagi avtomobil yo‘llari yoqasida 73 ta joyda yo‘l harakati ishtirokchilarini xushyorlikka, ogohlikka chaqiruvchi bannerlar, plakatlar hamda yirik savdo majmualari, yoqilg‘i qo‘yish shaxobchalariga kirish joylarida o‘rnatilgan kichik xajmli va Samarqand shahar ko‘chalarida o‘rnatilgan 10 ta katta hajmli ekranlarga “Yo‘l harakati qoidalari”ni targ‘ib qiluvchi videroliklar joylashtirildi.
Izoh (0)