Самарқанд вилояти Ички ишлар бошқармаси Йўл ҳаракат хавфсизлиги бошқармасида ҳафтанинг жума кунлари «Йўл ҳаракати хавфсизлиги куни» ва ҳар ойнинг учинчи жума куни «Автомобилсиз кун» акцияси бўйича матбуот анжумани бўлиб ўтди. Бу ҳақида «Дарё» мухбири Фарҳод Норбўтаев хабар бермоқда.
Матбуот анжуманида вилоят ИИБ ЙҲХБ бошлиғи Абдунаби Носировнинг маълум қилишича жорий йилнинг ўтган 8 ойи давомида вилоят бўйича содир этилган жами йўл-транспорт ҳодисалари 25 тага (539-564), улар оқибатида ҳалок бўлганлар сони 17 тага (179-196), тан жароҳати олганлар сони 41 тага (456-497) камайишига эришилган.
Жамоатчилик назоратини кучайтириш мақсадида вилоят ИИБ ЙҲХБнинг «Telegram», «Facebook» ижтимоий интернет тармоқларида алоҳида сайтларига фуқаролар томонидан келиб тушган таклифлар ўрганилиб, йўл ҳаракати иштирокчилари томонидан аниқланиб сайтга жойлаштирилган 300 дан ортиқ қоидабузарликлар бўйича қонуний чоралар кўрилган.
Абдунаби Носировнинг таъкидлашича, 53,3 минг нафар фуқароларга янги намунадаги ҳайдовчилик гувоҳномалари тарқатилган бўлиб, шундан 1713 таси Паст Дарғом туманида синов тарзида ташкил этилган давлат хизматлари маркази орқали берилган.
Вилоятда йилига 25 минг автотранспорт воситаси кўпайиши сабаб тирбандлик келиб чиқаётгани, айниқса, катта йўлларга ўрнатилган махсус муляжлар ва тезликни ўлчагич мосламалари ҳайдовчи ҳушёрлигини оширишга хизмат қилаётгани таъкидланди.
«Профилактика куни» муносабати билан 2751 маротаба маҳаллаларда, 2890 маротаба таълим муассасаларида, 4799 маротаба корхона-ташкилотлар ва бошқа аҳоли гавжум жойларда кенг жамоатчилик билан учрашувлар ҳамда профилактик тушунтириш ишлари ўтказиб келинди.
Вилоят ҳудудидан ўтувчи халқаро ва давлат аҳамиятидаги автомобиль йўлларига 69 та тезликни ўлчаш ускуналари ва 27 та йўл-патруль автомашинаси муляжи тайёрланиб, авария ўчоқларига ўрнатилди.
Вилоят ҳудудидаги автомобиль йўллари ёқасида 73 та жойда йўл ҳаракати иштирокчиларини хушёрликка, огоҳликка чақирувчи баннерлар, плакатлар ҳамда йирик савдо мажмуалари, ёқилғи қўйиш шахобчаларига кириш жойларида ўрнатилган кичик хажмли ва Самарқанд шаҳар кўчаларида ўрнатилган 10 та катта ҳажмли экранларга «Йўл ҳаракати қоидалари»ни тарғиб қилувчи видероликлар жойлаштирилди.
Изоҳ (0)