O‘zbekiston Maktabgacha ta’lim vazirligi Toshkent shahrining Shayxontohur tumanida joylashgan 197-maktabgacha ta’lim muassasasida tekshirish olib bordi. Natijalarni o‘z rasmiy saytida e’lon qildi.
Ma’lum bo‘lishicha, ushbu bog‘cha mudirasining o‘zini metodist deb tanishtirgan, muqaddam sudlangan onasi muassasaning pul oqimlarini boshqarib kelgan.
Audit o‘tkazilgan kuni taomnomaga muvofiq, ombordan 56,2 kg go‘sht hisobdan chiqarilgan, ammo oshxonadan avvaldan qaynatib qo‘yilgan 8,98 kg go‘sht topilgan, xolos. Keyinroq aniqlanishicha, har kuni tarbiyalanuvchilar uchun mo‘ljallangan go‘shtning yarmini bog‘cha mudirasining onasi olib ketgan.
Bundan tashqari, 197-MTM tarbiyalanuvchilarining ota-onalari 2018-yilning yanvaridan boshlab amaldagi tarif bo‘yicha 155 ming so‘m emas, balki 180 mingdan 280 minggacha pul to‘lab kelgan. Shuningdek, har oyda har bir bola uchun qo‘shimcha yeguliklar va fond uchun 25 mingdan to‘langan. Noqonuniy to‘lovlar kassaga tushmagan.
Tekshiruv kuni auditorlar 197-MTMga yo‘llanmasiz kelib-ketadigan 12 nafar bolani aniqladi. Ularning ota-onalari to‘lovni naqd shaklda bergan.
Shuningdek, bir necha tarbiyachilar, hamshira va farrosh lavozimlariga rasmiylashtirilgan shaxslar aslida ushbu muassasada ishlamasligi aniqlandi. Assossiz hisoblangan ish haqida 2015—2018-yillarda 61 million so‘mni tashkil qilgan.
Tekshiruvdan keyin 197-MTM mudirasi o‘z lavozimidan chetlatildi. Ammo telefon orqali tahdidlar tinmayotganligi sababli muassasada yangi mudiralar ishlay olmayapti. Ayni paytgacha mudira vazifasini bajaruvchi lavozimidan uch kishi bosh tortishga ulgurgan.
Audit hujjatlari tuman va Bosh prokuraturaga beriladi.
Izoh (0)