BMT vakili: O‘zbekistonda “Baxt maktablari” tashkil etiladi

18-sentabr kuni Toshkentda “Mustahkam oila” dasturi doirasida seminar o‘tkazildi, deb xabar beradi O‘zA.

Ushbu seminarda ishtirok etgan BMTning Giyohvand moddalar va jinoyatchilikka qarshi kurashish boshqarmasining Markaziy Osiyodagi mintaqaviy vakolatxonasi vakili Ashita Mittal O‘zbekistonda oilalarni mustahkamlash borasida olib borilayotgan ishlar xususida shunday dedi:

“ ‘Mustahkam oila’ dasturi AQSh va Buyuk Britaniyada ilk bor amaliyotga tatbiq etilgan. So‘ng boshqa ko‘plab rivojlangan mamlakatlarda bu loyiha qo‘llanilgan. Buni ishlab chiqish jarayonida har bir davlat o‘z milliy an’analari va mentalitetiga xos bo‘lgan jihatlarga e’tibor qaratadi. O‘zbekiston ham o‘z pozitsiyasi va avlodlar munosabatidan kelib chiqib loyihani hayotga tatbiq etmoqda. Yetti qismdan iborat dasturdan ko‘zlangan asosiy maqsad yoshlar orasida giyohvandlik, ichkilikbozlik, tamaki va alkogol mahsulotlari iste’mol qilinishining oldini olish, ota-ona va farzand o‘rtasidagi munosabatlar mustahkamligiga erishishdan iborat. Biz O‘zbekistonda trenerlar jamoasini tayyorlaymiz. Ular kelgusida tayanch maktab sifatida tashkil etiladigan maktablarda faoliyat yuritadi. Turli video materiallar, o‘yinlar orqali yosh avlod va ota-onalarning munosabatlarida muvozanatga erishish asosiy maqsaddir. Unda psixologlar, pedagoglar, mahalla faollari, ta’lim-tarbiyaga oid mutaxassislar ishtirok etadi. Ayni vaqtda Toshkent shahridagi 19-umumta’lim maktabida amaliyotga tatbiq etilgan dastur doirasida joriy yil oxirigacha namunaviy Happy schools (‘Baxt maktablari’) tashkil etiladi. Bugungi globallashuv davri ehtiyotkorlikni talab etmoqda. Mazkur maktablar zo‘ravonlik, jinoyatchilik, zararli odatlardan holi mustahkam oila va maktab hamkorligiga asoslangan xavfsiz maktablar bo‘ladi”.