Qirg‘izistonning Issiqko‘l shahrida tashkil etilgan Butunjahon ko‘chmanchi xalqlar o‘yinlarida ishtirok etgan 11 davlat vakillari tomonidan qabul qilingan qarorga ko‘ra ko‘pkari bo‘yichia birinchi Jahon chempionati 2019-yilda O‘zbekistonda bo‘lib o‘tadi, deb yozadi “Xalq so‘zi”.
“Hozircha ko‘pkari chempionati qaysi shahar va qaysi sanada o‘tkazilishi aniq emas, biroq qaror qabul qilindi: turnir kok-boru qoidalari asosida “to‘yqozonlar” bilan bo‘lib o‘tadi”, – deb ta’kidlaydi Qirg‘iziston Kok-boru federatsiyasi prezidenti Jirgalbek Samatov.
Qayd etilishicha, bugungi kunda ko‘pkarining bir necha turlari mavjud. Qirg‘izistonda qabul qilingan Kok-boru uslubida maydonning ikki chekkasida 2 ta ulkan “to‘yqozon” quriladi. Polvonlar uloqni raqib jamoa to‘yqozoniga solishi kerak. Ushbu uslubda otlar va polvonlar qozonga urilib jarohat olish ehtimoli ham oshadi. Qozog‘istonda qabul qilingan Kokpar uslubida esa to‘yqozonlar o‘rniga yerda aylanalar chiziladi. Jamoa ochko to‘plash uchun uloqni ushbu aylanalar ichiga keltirib tashlashi kerak. Qozog‘iston Kokparida jamoalar 3 bo‘lim o‘rniga 2 bo‘lim bellashadi.
Ma’lumot uchun, Qirg‘izistonda 2—8-sentabr kunlari bo‘lib o‘tgan III Butunjahon ko‘chmanchi xalqlar o‘yinlarida Kok-boru o‘yinida O‘zbekiston terma jamoasi kumush medaliga ega chiqdi.
Izoh (0)