Қирғизистоннинг Иссиқкўл шаҳрида ташкил этилган Бутунжаҳон кўчманчи халқлар ўйинларида иштирок этган 11 давлат вакиллари томонидан қабул қилинган қарорга кўра кўпкари бўйичиа биринчи Жаҳон чемпионати 2019 йилда Ўзбекистонда бўлиб ўтади, деб ёзади «Халқ сўзи».
«Ҳозирча кўпкари чемпионати қайси шаҳар ва қайси санада ўтказилиши аниқ эмас, бироқ қарор қабул қилинди: турнир кок-бору қоидалари асосида «тўйқозонлар» билан бўлиб ўтади», – деб таъкидлайди Қирғизистон Кок-бору федерацияси президенти Жиргалбек Саматов.
Қайд этилишича, бугунги кунда кўпкарининг бир неча турлари мавжуд. Қирғизистонда қабул қилинган Кок-бору услубида майдоннинг икки чеккасида 2 та улкан «тўйқозон» қурилади. Полвонлар улоқни рақиб жамоа тўйқозонига солиши керак. Ушбу услубда отлар ва полвонлар қозонга урилиб жароҳат олиш эҳтимоли ҳам ошади. Қозоғистонда қабул қилинган Кокпар услубида эса тўйқозонлар ўрнига ерда айланалар чизилади. Жамоа очко тўплаш учун улоқни ушбу айланалар ичига келтириб ташлаши керак. Қозоғистон Кокпарида жамоалар 3 бўлим ўрнига 2 бўлим беллашади.
Маълумот учун, Қирғизистонда 2—8 сентябрь кунлари бўлиб ўтган III Бутунжаҳон кўчманчи халқлар ўйинларида Кок-бору ўйинида Ўзбекистон терма жамоаси кумуш медалига эга чиқди.
Изоҳ (0)