Qozog‘istonda bo‘lib o‘tayotgan sud majlisida O‘zbekistonning 52 fuqarosi o‘limiga sabab bo‘lgan Aqto‘be fojiasining asl sababi rasman e’lon qilindi. Bu haqda Nur.kz saytiga asoslanib Uz24 xabar qiladi.
Sudda prokuror Usmon O‘rinbasaruli yongan avtobusga egalik qiluvchi “Aziya tranzit servis” kompaniyasi rahbari va xodimlari bo‘lgan sudlanuvchilarga xizmat vazifalariga sovuqqonlik bilan qarash, nosoz avtotransportni ekspluatatsiya qilish oqibatida ikki va undan ortiq kishining o‘limiga sabab bo‘lish, hujjatlarni qalbakilashtirish kabi ayblovlarni ilgari surdi.
Shuningdek, har ikki yilda texnik ko‘rikdan o‘tishi shart bo‘lgan avtobus oxirgi marta 2015-yilda bunday ko‘rikdan o‘tkazilgan. Haydovchilardan biri haydovchilik guvohnomasi olib qo‘yilgan bo‘lsa-da, avtobusni boshqargan. Avtomexanik Bahodir Perdebayev esa nosoz avtobusning xizmat ko‘rsatishiga ruxsat bergan. Avtobus ana shunday qator kamchiliklar bilan Sariog‘ochdan Qozon shahriga yo‘l olgan.
Uch haydovchi solyarka muzlab qolguniga qadar navbat bilan avtobusni boshqarib borgan.
2018-yilning 18-yanvarida fojia yuz bergan kuni haydovchi Nurjon Qirg‘izboyev yo‘lovchilar isinishi uchun kavsharlash lampasini salonga olib kirgan va yana bir haydovchi Barot Tanatov bilan birga tashqariga chiqib ketgan.
“Qirg‘izboyev yong‘inga qarshi qoidalarni buzgan holda yonib turgan kavsharlash lampasini benzin to‘la kanistr yoniga qo‘ygan. Kanistr yonida ikki yo‘lovchi va haydovchi Maqsad Pernebekov bo‘lgan. Haydovchilar Qirg‘izboyev va Tanatov pastga tushib shu atrofda to‘xtab turgan mashinadan avtobusni tortib ketishni so‘ramoqchi bo‘lishgan.
Avtobusga qaytganlarida yo‘lovchilardan birining shimi yonayotganini ko‘rishgan. Yo‘lovchi tashqariga otilib chiqib qorda kiyimini o‘chirmoqchi bo‘lgan. Bu paytda avtobus portlovchi gazlar bilan to‘lib qolgandi. Portlashdan bir necha soniya oldin yo‘lovchilardan biri va haydovchi Maqsad Pernebekov salondan chiqishga muvaffaq bo‘lgan, lekin ularning oyoq-qo‘llari kuygan.
Portlash sodir bo‘lgan va ikkinchi qavatdagi 52 yo‘lovchining barchasi tiriklay yonib ketgan”, — degan prokuror sud majlisida.
Ekspertiza xulosalariga ko‘ra, ular is gazidan zaharlanish va kuyish natijasida halok bo‘lgan.
Mazkur fojia bo‘yicha sud majlisi 3-sentabrda boshlangan, unda marhumlarning yaqinlari ularning halok bo‘lganiga ishonmasliklarini aytgandi.
Izoh (0)