Namangan viloyatining Uychi tumanida yoshlar sport bayrami boʻlib oʻtdi. Bu haqda “Daryo” muxbiri xabar bermoqda.
“Paxtakor” oʻyingohidagi tadbirni tuman hokimi Muhammadayubxoʻja Apaqov hamda viloyat jismoniy tarbiya va sport boshqarmasi boshligʻi Shokirjon Qoraboyev tabrik soʻzi bilan boshlab berdi. Tuman sanʼatkorlari tomonidan konsert dasturi namoyish etildi.
Musobaqalar sportning 5 turi — yengil atletika, stol tennisi, futbol, voleybol va basketbol boʻyicha oʻtkazildi. Ularda viloyatning barcha shahar va tumanlaridan kelgan 1000 ga yaqin yosh ishtirok etdi.
Tashkilotchilarga koʻra, asosiy maqsad yuqori natijalar emas, balki mahallalarda sogʻlom turmush tarzini targʻib etish, yoshlar vaqtini samarali va koʻngilli oʻtkazishini taʼminlashdan iborat boʻldi.
Sport bayramida mezbonlarning qoʻli baland keldi. Ikkinchi va uchinchi oʻrinlar Yangiqoʻrgʻon hamda Kosonsoy jamoalariga nasib etdi.
Gʻoliblarga tuman hokimligi, viloyat kasaba uyushmalari tashkilotlari birlashmasi va Yoshlar ittifoqi viloyat kengashi tomonidan sovgʻa va diplomlar topshirildi.
Izoh (0)