O‘zbekiston milliy teleradiokompaniyasi raisi Alisher Xo‘jayev Turkiyaning TRK AVAZ telekanali rahbari Sedat Sagrikaya bilan uchrashdi. Bu haqda Alisher Xo‘jayevning Facebook’dagi sahifasida ma’lum qilindi.
Uchrashuvda TRK AVAZ telekanali milliy teleradiokompaniyada tayyorlangan madaniyat, urf-odat va an’analar, tarix va boshqa mavzulardagi teleko‘rsatuvlarni o‘zbek tilida bevosita efirga uzatishni rejalashtirayotgani qayd etildi.
Har haftada bir marta O‘zbekiston milliy teleradiokompaniyasi TRK AVAZ telekanalining efir vaqti uchun bir yarim soatlik hajmidagi teleloyihani amalga oshirish yuzasidan fikr almashildi.
Shuningdek, Amir Temur, Ulug‘bek, Aliqushchi va boshqa buyuk tarixiy shaxslar to‘g‘risida dasturlar yaratish bo‘yicha telekanallar bilan qo‘shma loyihalarni amalga oshirish borasida hamkorlikni yo‘lga qo‘yish rejalashtirildi.
Turkiyaning TRK AVAZ telekanali sentabr oyida Shahrisabz shahrida o‘tkazilishi rejalashtirilayotgan “Maqom” xalqaro festivali faoliyatini to‘liq hajmda yoritishga tayyor ekanini bildirdi.
Uchrashuvda, shuningdek, zamonaviy talab va texnologiyalarni inobatga olgan holda qo‘shma loyihalarni yaratish bo‘yicha tajriba almashish maqsadida xodimlarning o‘zaro tashriflarini tashkil etish, jumladan, har ikki mamlakat xalqlarining madaniyati, tarixi, madaniy merosi hamda turizm borasidagi dasturlarni translyatsiya qilish bo‘yicha qo‘shma loyihalarni amalga tatbiq etish imkoniyatlari ko‘rib chiqildi.
Izoh (0)