Ўзбекистон миллий телерадиокомпанияси раиси Алишер Хўжаев Туркиянинг TRK AVAZ телеканали раҳбари Седат Сагрикая билан учрашди. Бу ҳақда Алишер Хўжаевнинг Facebook’даги саҳифасида маълум қилинди.
Учрашувда TRK AVAZ телеканали миллий телерадиокомпанияда тайёрланган маданият, урф-одат ва анъаналар, тарих ва бошқа мавзулардаги телекўрсатувларни ўзбек тилида бевосита эфирга узатишни режалаштираётгани қайд этилди.
Ҳар ҳафтада бир марта Ўзбекистон миллий телерадиокомпанияси TRK AVAZ телеканалининг эфир вақти учун бир ярим соатлик ҳажмидаги телелойиҳани амалга ошириш юзасидан фикр алмашилди.
Шунингдек, Амир Темур, Улуғбек, Алиқушчи ва бошқа буюк тарихий шахслар тўғрисида дастурлар яратиш бўйича телеканаллар билан қўшма лойиҳаларни амалга ошириш борасида ҳамкорликни йўлга қўйиш режалаштирилди.
Туркиянинг TRK AVAZ телеканали сентябрь ойида Шаҳрисабз шаҳрида ўтказилиши режалаштирилаётган «Мақом» халқаро фестивали фаолиятини тўлиқ ҳажмда ёритишга тайёр эканини билдирди.
Учрашувда, шунингдек, замонавий талаб ва технологияларни инобатга олган ҳолда қўшма лойиҳаларни яратиш бўйича тажриба алмашиш мақсадида ходимларнинг ўзаро ташрифларини ташкил этиш, жумладан, ҳар икки мамлакат халқларининг маданияти, тарихи, маданий мероси ҳамда туризм борасидаги дастурларни трансляция қилиш бўйича қўшма лойиҳаларни амалга татбиқ этиш имкониятлари кўриб чиқилди.
Изоҳ (0)