Innovatsion rivojlanish vazirligida O‘zbekistonda masofaviy oliy ta’lim muassasasi — “Kelajak universiteti”ni ishga tushirish masalasida yig‘ilish o‘tkazildi. Yig‘ilishda Innovatsion rivojlanish vaziri o‘rinbosari Yulbarsxon Mansurov, AQShning UdacityX masofadan o‘qitish muassasasi direktori Robert Danbar, Niderlandiyaning MOOC Iversity ta’lim muassasasi rahbari Deniel Zareskiy, Turizmni rivojlantirish qo‘mitasining mas’ullari qatnashdi. Bu haqda “Daryo”ga vazirlik matbuot xizmati ma’lum qildi.
O‘zbekistonda masofadan o‘qitiladigan oliy ta’lim muassasasi — “Kelajak universiteti” CityU MOOK (Gonkong), UdacityX (AQSh), Open Polytechnics (Yangi Zelandiya) va MOOC Iversity (Niderlandiya) kabi xorijiy investorlar ishtirokida ochilishi ko‘zda tutilmoqda.
Loyiha doirasida oliy ta’lim jarayoniga ilg‘or pedagogik va axborot texnologiyalarini, ilm-fanning eng so‘nggi yutuqlarini va texnikalarni joriy qilish nazarda tutilgan. Buning uchun elektron axborotlarni va ta’lim resurslarini (o‘zbek va rus tillariga tarjima qilingan) o‘z ichiga olgan hamda talabalar (yiliga 50 ming nafar atrofida) tomonidan ta’lim dasturlarini, ularning qayerda bo‘lishlaridan qat’iy nazar, o‘zlashtirishlarini ta’minlaydigan elektron axborot-ta’lim muhitining ishlashi uchun shart-sharoitlar yaratish talab etiladi.
Statistik ma’lumotlarga qaraganda 2016-yili O‘zbekistonda 663 ming abituriyent OTMga ariza topshirgan, ulardan atigi 57,9 ming nafari o‘qishga kirgan (bu istovchilarning 9 foizini tashkil etadi). Bu ko‘rsatkich Janubiy Koreyada 93, AQShda 85, Eronda 71, Germaniyada 68, Tojikistonda 28 va Ozarbayjonda 25 foizni tashkil etadi.
Bundan tashqari, talabalarni yotoqxonalar bilan qamrab olish darajasi ham anchayin past. Aksariyat OTMlarning poytaxtda joylashganini inobatga olsak, 73,4 ming nafar talaba ijaraga turishga majbur. “Kelajak universiteti”ning ochilishi esa o‘z navbatida bu muammoni ham inobatga olgan bo‘lib, hududlarda zarur uskunalar, kompyuter va boshqa texnikalar, Internetga kirish tizimi bilan jihozlangan filiallarining ochilishi nazarda tutilgan.
Universitetning bosh idorasida va filiallarida talabaning shaxsini tekshirish va imtihonlarni topshirish tartibini nazorat qilishni ta’minlagan holda attestatsiya imtihonlari o‘tkaziladi. Bunda Yangi Zelandiyada necha yillar davomida tajribada sinalgan tizim joriy etiladi.
O‘qishga kirish ochiq va shaffoflik tamoyillarga asoslangan holda amalga oshiriladi, talabalar sonining maqbul darajasi shakllanguniga qadar birinchi yillari imtihon ham topshirilmaydi.
O‘qish uchun to‘lov 1,5 million so‘m atrofida bo‘lishi muhokama qilinmoqda. Davlat OTMlarining kontrakt to‘lovlari bu miqdordan bir necha baravar yuqoriligi hech kimga sir emas.
Izoh (0)