O‘zbekiston Respublikasi IIV Yong‘in xavfsizligi institutida “Tilsiz yovga qarshi birgalikda kurashamiz” mavzuida respublika ilmiy-amaliy seminari o‘tkazildi. Bu haqda “O‘ztransgaz” AJ Axborot xizmati xabar berdi.
Yig‘ilishda ta’kidlanishicha, joriy yilning o‘tgan olti oyida O‘zbekistonda 5 ming 772 ta yong‘inlar sodir bo‘lgan. Tan jarohati olganlar esa ikki yuz nafar kishidan iborat. Eng achinarlisi, 74 nafar fuqaro olamdan o‘tgan. Bugungi kunda yong‘inlarning 70 foizi aholi yashash joylarida, xonadonlarda sodir bo‘lmoqda.
Amaliyotlar shuni ko‘rsatadiki, asosiy halokatlar va tan jarohatlari nosoz va qo‘lbola gaz qurilmalari, yaroqsiz elektr moslamalari tufayli va isitish uskunalaridan xavfsizlik qoidalariga rioya etmasdan foydalanish, spirtli ichimliklar iste’mol qilib hushyorlikni yo‘qotish oqibatida yuzaga kelgan.
Ta’kidlanishicha, hamkor tashkilotlar tomonidan hamjihatlikda yong‘inning oldini olish, aholi xavfsizligini ta’minlash, gaz, elektr energiyasi, isitish uskunalaridan foydalanishda qat’iy qoidalarga rioya qilish bo‘yicha takliflar ko‘rib chiqilmoqda.
Davlat yong‘in xavfsizligi xizmati, Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika Kengashi boshqaruvi hamda “O‘ztransgaz” aksiyadorlik jamiyati hamkorligida aholi turar joylarida, maishiy xizmat ko‘rsatish inshootlarida yong‘in xavfsizligini ta’minlash, bu borada fuqarolarning hushyorligini oshirishga qaratilgan ma’rifiy targ‘ibot ishlari kuchaytirishga alohida ahamiyat qaratilyapti.
Izoh (0)