O‘zbekistonda xatlovdan o‘tkazilgan 5 mingdan ortiq bolalar bog‘chasining aksariyati ta’mirga muhtojligi aniqlandi

O‘zbekistondagi barcha 5240 ta maktabgacha ta’lim muassasasi to‘liq xatlovdan o‘tkazildi. Ularning aksariyati ta’mirtalab ahvolda ekanligi, moddiy-texnika bazasi yangilanmagani aniqlandi. Bu haqda Bosh prokuratura huzuridagi Axborot-tahlil multimedia markazi ma’lum qildi, deya xabar beradi “Xalq so‘zi”.

“Qiladigan ishlarimiz juda ham ko‘p. Albatta, mavjud muammolarni qisqa muddatda bajarish qiyin. Shu bois, mavjud kamchiliklarni bartaraf etish maqsadida 2021-yilgacha maxsus dastur qabul qilindi. Bunda, birinchi navbatda, ta’mirlash-qurish ishlarini eng chekka hududdagi ahvoli og‘ir MTMlardan boshlash rejalashtirilgan”, — deydi Maktabgacha ta’lim vazirligi boshqarma boshlig‘i Abdug‘ulom Hakimov.

Ma’lumotlarga ko‘ra, respublikada amalga oshirilayotgan “Obod qishloq” dasturi doirasida 264 ta, “Obod mahalla” dasturi doirasida esa 105 ta maktabgacha ta’lim muassasasi to‘liq ta’mirlanmoqda.

Joriy yilda jami 736 ta maktabgacha ta’lim muassasasi moddiy-texnika bazasini mustahkamlash ko‘zda tutilgan.