Tojikiston to‘qimachilik sanoati vakillaridan iborat delegatsiya O‘zbekistonga bir haftalik tanishuv safarini boshladi. Bu haqda “Xalq so‘zi” xabar bermoqda.
Bundan ko‘zlangan maqsad Tojikiston to‘qimachilik va tikuv-trikotaj sanoati yetakchilarini O‘zbekistonning mazkur sohasida to‘plangan boy tajribasi bilan yaqindan tanishtirish hamda tomonlar o‘rtasidagi hamkorlik aloqalarini yo‘lga qo‘yishdan iborat.
Delegatsiya tarkibidan yirik to‘qimachilik va tikuv-trikotaj fabrikalari, konsalting kompaniyalari, Savdo-sanoat palatasi, Xususiy sektorni rivojlantirish kengashi, shuningdek, oliy o‘quv yurtlari hamda xalqaro tashkilotlar rahbarlari o‘rin olgan.
— Biz Tojikiston va O‘zbekiston o‘rtasidagi munosabatlarda yangi sahifalar ochilganidan xursandmiz, — deydi Shveysariya hukumati tomonidan moliyalashtiriladigan Xalqaro savdo markazining Tojikistondagi dasturi milliy menejeri Saidmo‘min Kamolov. — Bu bizga qo‘shnilarimizning tajribalarini o‘rganish imkonini berdi. Tashrif dasturida O‘zbekiston tikuvchilik va to‘qimachilik sanoatini qo‘llab-quvvatlash bo‘yicha davlat dasturlari bilan yaqindan tanishish ko‘zda tutilgan. Aminmanki, mazkur tashrif Tojikiston to‘qimachilik va tikuv-trikotaj sanoati vakillari uchun mamlakatdagi ishbilarmonlik muhitini yaxshilashda yangi g‘oyalarni ilgari surish, shuningdek, yangi biznes-aloqalarni yo‘lga qo‘yishga yordam beradi.
Tashrif davomida to‘g‘ridan-to‘g‘ri ishbilarmonlik aloqalarini yo‘lga qo‘yish, qo‘shma korxonalar ochish, hamkorlik memorandumini imzolash bo‘yicha muzokaralar o‘tkazilishi ko‘zda tutilgan.
Izoh (0)