Marg‘ilondagi “Mehribonlik uyi”da sodir etilgan jinoyat ishi bo‘yicha guvohlar va jabrlanuvchilar ko‘rsatmalari tinglangani haqida xabar bergan edik.
Sobiq direktor K.Yakubovga nisbatan Jinoyat kodeksi (JK)ning 207–moddasi (mansabga sovuqqonlik bilan qarash), 167-moddasi (o‘zlashtirish yoki rastrata yo‘li bilan talon-toroj qilish), 209-moddasi (mansab soxtakorligi), 115-moddasi (shaxsning homilasini majburiy ravishda sun’iy tushirish) bo‘yicha, shuningdek, direktor o‘rinbosari S.Usmonov, bosh hisobchi A.Mo‘ydinova, hisobchi A.Saidkamolova, feldsher I.Yo‘ldoshev, tarbiyachilar X.Yakubova, R.Abdufattoyev, N.Soliyeva, enagalar D.Jo‘raboyeva, X.To‘rayevaga nisbatan ham Jinoyat kodeksining tegishli moddalari bilan ayblov hukmi chiqarildi deb xabar beradi O‘zA.
Jinoyat ishlari bo‘yicha Farg‘ona viloyati sudida sudya R.Arabov raisligida mazkur jinoyat ishi xolislik va adolat mezonlari asosida ko‘rib chiqildi.
Marg‘ilon shahar 1-Mehribonlik uyi direktori Kamol Yakubov mansabiga sovuqqonlik bilan qaragan, o‘z vazifasiga loqaydlik va vijdonsizlarcha munosabatda bo‘lgan, muassasa ishini, muassasa tarbiyalanuvchilarini ma’naviy sog‘lom va jismonan barkamol etib tarbiyalash borasidagi faoliyatini izdan chiqarib yuborgan, tarbiyalanuvchilarning huquqlari va qonun bilan qo‘riqlanadigan manfaatlari hamda davlat manfaatiga jiddiy ziyon yetishiga sababchi bo‘lgan.
Sobirjon Usmonov ham Mehribonlik uyi direktorining ma’naviy-ma’rifiy ishlar bo‘yicha o‘rinbosari lavozimida ishlab o‘z vazifasi yuzasidan bajarishi shart bo‘lgan harakatlarni qasddan bajarmasdan, ushbu harakatsizlikni jinoyatga yo‘l qo‘ygan holda sodir etgan.
Oqibatda muassasa tarbiyachilari Xurshida Yakubova va Nargiza Soliyevalar hamda enagalar Xanifa To‘rayeva, Dildora Juraboyevalar mehnat faoliyati davomida Mehribonlik uyida tarbiyalanayotgan, voyaga yetmagan, maktabgacha yoshdagi (3-7 yosh) bolalarni muttasil ravishda urib-do‘pposlash, ularga rahmsiz muomala qilish, sha’ni va qadr-qimmatini kamsitish va boshqa harakatlar bilan qiynab kelganlar. Shu kabi jinoyatlarni tarbiyachi Ravshan Abdufattoyev va feldsher Ixtiyor Yo‘ldoshevlar ham sodir etgan.
Bundan tashqari, voyaga yetmagan tarbiyalanuvchi D.R. tarbiyalanuvchi A.R. bilan ixtiyoriy tarzdagi jinsiy aloqa natijasida homilador bo‘lib qolgani aniqlangan. K.Yakubov hamshira G.Topvoldiyeva (jinoyat ishining unga nisbatan qismi alohida ish yurituviga ajratilgan) bilan oldindan jinoiy til biriktirib, bir guruh bo‘lib, muassasa tarbiyalanuvchisi D.R. ning homilador bo‘lib qolganini ommaga oshkor qilmaslik va bu bilan mansab mavqeyiga nisbatan yuzaga kelishi mumkin bo‘lgan salbiy holatlarning oldini olish maqsadida g‘araz niyatda D.R. ning homilasini sun’iy ravishda majburan tushirib yuborgan.
S.Usmonov va I.Yo‘ldoshev ham muassasa tarbiyalanuvchisi A.R. va K.P. larga zo‘rlik ishlatmay uyatsiz-buzuq harakatlar sodir etgan.
Direktor K.Yakubov, bosh hisobchi A.Muydinova, hisobchi A.Saidkamolova va direktor o‘rinbosari S.Usmonovlar oldindan jinoiy til biriktirib 167 million so‘m budjet mablag‘larini o‘zlashtirish va rastrata qilish yo‘li bilan talon-toroj qilganlar.
Sudlanuvchilar K.Yakubov va S.Usmonovga 4 yil, I.Yo‘ldoshevga 3 yil-u 6 oy, R.Abdufattoyevga 3 yil ozodlikdan mahrum qilish jazosi tayinlandi.
Shuningdek, sudlanuvchilar X.Yakubova, N.Soliyeva, D.Jo‘raboyeva va X.To‘rayevalarga 3 (uch) yil ozodlikni cheklash, sudlanuvchilar A.Muydinova va A.Saidkamolovaga JKning 45-moddasi qo‘llanib, 3 yil muddatga moddiy javobgarlik va mansabdorlik lavozimlarida ishlash huquqidan mahrum qilish, ish haqining 20 foizini davlat daromadi hisobiga ushlab qolgan holda 3 yil axloq tuzatish ishlari jazosi tayinlandi.
18-aprelda boshlangan sud o‘z nihoyasiga yetdi. Sudlanuvchilarga tegishli jazo tayinlandi.
Sud Farg‘ona viloyati xalq ta’limi boshqarmasi va Marg‘ilon shahridagi Mehribonlik uyi rahbariyatiga mazkur jinoyatning kelib chiqish sabablari va kelgusida bunday holatlarning oldini olish yuzasidan xususiy ajrim chiqardi.
Izoh (0)