Тожикистон тўқимачилик саноати вакилларидан иборат делегация Ўзбекистонга бир ҳафталик танишув сафарини бошлади. Бу ҳақда «Халқ сўзи» хабар бермоқда.
Бундан кўзланган мақсад Тожикистон тўқимачилик ва тикув-трикотаж саноати етакчиларини Ўзбекистоннинг мазкур соҳасида тўпланган бой тажрибаси билан яқиндан таништириш ҳамда томонлар ўртасидаги ҳамкорлик алоқаларини йўлга қўйишдан иборат.
Делегация таркибидан йирик тўқимачилик ва тикув-трикотаж фабрикалари, консалтинг компаниялари, Савдо-саноат палатаси, Хусусий секторни ривожлантириш кенгаши, шунингдек, олий ўқув юртлари ҳамда халқаро ташкилотлар раҳбарлари ўрин олган.
— Биз Тожикистон ва Ўзбекистон ўртасидаги муносабатларда янги саҳифалар очилганидан хурсандмиз, — дейди Швейцария ҳукумати томонидан молиялаштириладиган Халқаро савдо марказининг Тожикистондаги дастури миллий менежери Саидмўмин Камолов. — Бу бизга қўшниларимизнинг тажрибаларини ўрганиш имконини берди. Ташриф дастурида Ўзбекистон тикувчилик ва тўқимачилик саноатини қўллаб-қувватлаш бўйича давлат дастурлари билан яқиндан танишиш кўзда тутилган. Аминманки, мазкур ташриф Тожикистон тўқимачилик ва тикув-трикотаж саноати вакиллари учун мамлакатдаги ишбилармонлик муҳитини яхшилашда янги ғояларни илгари суриш, шунингдек, янги бизнес-алоқаларни йўлга қўйишга ёрдам беради.
Ташриф давомида тўғридан-тўғри ишбилармонлик алоқаларини йўлга қўйиш, қўшма корхоналар очиш, ҳамкорлик меморандумини имзолаш бўйича музокаралар ўтказилиши кўзда тутилган.
Изоҳ (0)