Qoraqalpog‘istondagi ayrim ovullar aholisi shoqol ko‘payib ketganidan shikoyat qildi

Qoraqalpog‘istonning Kegeyli tumanidagi Qilqali ovuli aholisi qishloqda shoqol ko‘payib ketganligidan shikoyat qilmoqda. Yovvoyi hayvonlar aholini tovuqlarni yeb ketmoqda, oxirgi paytlarda qo‘zi-uloqlarga hujum qila boshladi, deya xabar beradi O‘zA.

— Shoqollar kunduzi ham uyimizning oldigacha keladigan bo‘ldi, — deydi qishloq vakillaridan biri Shamshetdin Bekanov. — Qishloqdagi 3-4 xonadonning uloqlarini tortib ketdi. Endi echkilarga ham hamla qila boshladi. Bolalarimizni uydan chiqarishga xavotir qila boshladik.

Aniqlanishicha, shoqollarning ko‘payishi keyingi yillarda sezilarli oshgan. Qishloq aholisining ta’kidlashicha, o‘tgan yili hokimlikdan kelgan vakillarga ushbu muammo yetkazilgan va ular buni bartaraf qilish bo‘yicha va’da bergan. Lekin hanuzgacha chora ko‘rilmagan.

— Yirtqich boqayotgan tovuqlarimni yeb bitirdi, — deydi aholi vakillaridan biri Ayapbergen Yerimbetov. — Yaqinda qo‘raga kirib bir uloqni qontalash qilgan, yana bittasini o‘zi bilan olib ketgan. Bunga tegishli, mas’ul idoralar darhol chora ko‘rishmasa, qishloq aholisi xotirjam yashay olmaydi. Avvalgi yillarda qishloqdan tashqarida o‘laksalarga zahar tashlanib, ko‘payib ketgan shoqol, tulki va boshqa yirtqich hayvonlarning bosh soni kamaytirilar edi. Keyingi paytlarda bu tadbir qo‘llanilmay qo‘ydi.

Veterinariya xizmati vakillari bu kabi tadbirni amalga oshirish mumkin ekanligini ta’kidlaydi. Ya’ni, buning uchun tuman hokimligi rasmiy talabnoma bilan chiqishi kerak. So‘ng tegishli korxonadan zarur ashyolar olinib, maxsus zaharli dori tayyorlanadi va tegishli hududlarga joylashtiriladi.

Shoqol quturish kasalligining qo‘zg‘atuvchisini tarqatuvchi hayvon sanaladi. Agar u uy hayvonlarini tishlasa, unga darhol chora ko‘rilishi kerak.

Shunday holat yaqinda Qorao‘zak tumanida ham sodir bo‘lgan. Ya’ni, shoqol bitta qora molni tishlagan. Qora molni so‘yib, tekshirib ko‘rilganda quturish kasalligini yuqtirganligi alomatlari qayd qilingan.

Davlat bionazorat inspeksiyasi mutasaddi vakillari ham agar tuman hokimligi tomonidan ushbu muammoni bartaraf qilish so‘ralsa, belgilangan tartibda Ovchilar jamiyati xodimlari safarbarligida haddan ziyod ko‘paygan xavf soluvchi hayvonlar bosh sonini kamaytirish mumkin ekanligini bildirdi.